РФ-ни Правительствосуну таматасыны орунбасары Дмитрий Чернышенкону эмда РФ-ни Президентини Шимал-Кавказ федерал округда толу эркинликли келечиси Юрий Чайканы башчылыкъларында бардырылгъан кенгешде округда культура, спорт, туризм сфералада цифралы амалланы айнытыуну соруулары сюзюлгендиле. Анга КъМР-ни Башчысы Казбек Коков да къатышханды.
Полпред, жыйылгъанланы алгъышлай, вице-премьер Дмитрий Чернышенкогъа Шимал Кавказгъа бурулгъан эс ючюн ыразылыгъын билдиргенди.
- Жууукъ жыллада цифралы амалланы сингдириу экономиканы бёлюмлерин тюрлендирликди, аны файдалылыгъын ёсдюрлюкдю, шёндюгю цифралы платформаланы мурдорунда жамауат байламлыкъланы алышырыкъды, инсанла жашау магъаналы информация бла тыйгъычсыз, чырмаусуз хайырланырча этерикди. Бюгюнлюкде окъуна цифралы технологияла урунууну рыногуна себеплик этгендиле, жангы усталыкъла къуралгъанлары баямды. Ала уа инсанланы билимлерин кенгертирге, жангы усталыкълагъа юйренирге кёллендиреди. Шимал Кавказны регионларына уа заман бла тенг айныгъан бютюнда магъаналыды,-дегенди полпред.
Аны айтханына кёре, округну субъектлеринде «Цифраны экономика» миллет программаны бийик даражада толтурургъа, документде белгиленнген жумушланы болжалларын сакъларгъа керекди.
- Ол туризмде да магъаналыды. Кавказны кёпле саулукъну, узакъ ёмюрню белгисинча таныйдыла. География болум, табийгъат-хауа энчиликле бизни башха регионланы арасында конкурентли этедиле. Алай эсе уа, битеу болгъан онгланы файдалы хайырланыргъа, инвесторлагъа тийишли мадарла къураргъа, аны бла бирге уа курортларыбызны аяргъа, аланы ёсюп келген тёлюлеге сакъларгъа борчлубуз.
Экономиканы, финанс институтланы айнытыугъа уллу кючле салып, адамларыбызны унутургъа ахырда жарамайды. Фахмулу жаш тёлюге болушургъа, чыгъармачылыкъ онгларын айнытыргъа, аланы саулукълу жашау бардырыргъа кёллендирирге уа «Культура» эм «Спорт -жашауну низамы» проектле себеплик этерикдиле. Шимал Кавказны халкъларыны кеслерини культураларына, адетлерине, тёрелерине сюймекликлерин да унутургъа жарарыкъ тюйюлдю,-деп чертгенди Юрий Чайка.
Полпред кенгешде федерал эм регион власть органланы араларында байламлыкъланы къураугъа энчи эс бурургъа, «Цифралы экономика» миллет программада, «Культура» эм башха миллет проектледе белгиленнген жумушланы тамамлауда жетишимлени бла тыйгъычланы ачыкъларгъа чакъыргъанды. «Сейирлери болгъан битеу органланы ишлери бирге келишдирилсе, округда онгланы файдалы хайырланыргъа, 2030 жылгъа дери миллет муратланы чеклеринде толтурургъа белгиленнген жумушланы тамамларгъа къолдан келлигине ишексизме»,-дегенди сёзюню ахырында къыралны башчысыны толу эркинликли келечиси.
Хар регионда да толтуруучу власть органлада цифралы айнытыу жаны бла жууаплы къуллукъчула боллукъдула, деп билдиргенди Дмитрий Чернышенко. Аланы ишлерин РФ-ни Коммуникацияла эм связь министерствосу келишдирликди. Ведомство къыралны хар субъектинде цифралы айнытыу не халда болгъанына багъа да берликди.
Регионлагъа бу жумушланы жашауда бардырыргъа 2024 жылгъа дери 86 миллиард сом бериллиги да белгили этилгенди. Дмитрий Чернышенко регионланы туризм сферада миллет проектни жарашдырыуда магъаналарын чертгенди эмда СКФО-ну субъектлерин 2020 жылда къыралны ичинде туризмни айнытыу жаны бла программагъа башламчылыкъла этерге чакъыргъанды. Бу программаны чеклеринде уа алгъаракълада 15 миллиард сом бёлюннгенди, ахча Россейде солургъа сюйген туристлеге субсидиялагъа юлешинирикди. Бу амал бла 3 миллион адам хайырланырыгъы белгиленеди.
