Тырныауузда сабий искусстволаны школуна 38 жыл болады. Бери  алтыдан онбешге дери жыл сан къауумда эки жюзден аслам сабий жюрюйдюле.  Ол жылланы ичинде  махкеме ишин бардыргъанлай тургъанды.
 Алай а бу мекямда тынгылы ремонт ишле бир да бардырылмагъандыла.  Аны себепли быргъылары, юй башы, тюп къангалары, актовый  эм хореография заллары  осал халгъа келгендиле. «Маданият» миллет проект бла хайырланып, бу билим берген учрежденияда  тынгылы тапландырыу ишле башланнгандыла.
- Мекям эскиди, къол тийилмей тургъаны ючюн  аны халы осалды. Къабыргъалары бла фундаментинден къалгъанын  битеу жангыртыргъа керекди. Къысха заманны ичинде этиллик  затла асламдыла, аны себепли ишни къыстау бардырабыз. Бюгюнлюкде демонтажны  бошагъанбыз, суу баргъан быргъыланы жангыдан тартханбыз, терезелени битеу алышханбыз.
Шёндю мекямны тюп къатысын жангырта турабыз. Ызы бла юй башына кёчерикбиз. Экинчи айдан а айбатландырыу ишлени башларыкъбыз. План бла декабрьни ахырына дери бошаргъа борчлубуз,  алай а ишни барыууна кёре уа  эки айгъа алгъа тамам этерикбиз, - деп, билдиргенди подряд организацияны таматасы Уяналаны Ибрагим.
Махкемени директору Наталья Ридингерни айтханына кёре, хореография класс да кенгертилликди. Аны хайырындан бери болгъанындан да кёп сабий жюрюяллыкъды. Дагъыда  ол миллет тепсеулеге юйретирге онг чыгъарыгъын да энчи чертгенди.