Тюнене Федерация Советни Председателини биринчи орунбасары Николай Фёдоров бла Къырал Думаны Председателини орунбасары Ирина Яровая Россей Федерацияны законла чыгъарыучуларыны советини президиумуну жыйылыуун бардыргъандыла. Аны ишине КъМР-ни Парламентини Председатели, РФ-ни законла чыгъарыучуларыны советини социал политиканы ишлери жаны бла комиссиясына кирген Татьяна Егорова да къатышханды.
Видеоконференция халда баргъан кенгешде гитче эмда орта предпринимательствогъа себеплик этиуню къыйматлы амаллары, Россейни ич туризмин айнытыуну онглары да сюзюлгендиле. Бу бёлюмлеге пандемияны кезиуюнде артыкъда уллу заран тюшгени энчи белгиленнгенди.
Николай Фёдоров федерал властьланы бюгюнлюкде баш къайгъырыулары халкъны иш бла жалчытыугъа эмда файдаларын ёсдюрюуге, экономиканы айнытыугъа себеплик этерик мадарланы битеумиллет планыны проектин жарашдырыуну ахырына жетдириу болгъанын чертип айтханды. Федерация Совет предпринимательлеге тутхучлулукъ этиу жаны бла регионла бла уллу иш бардыргъанды, дегенди.
–Субъектлени асламысында налог салыуну тынч амалына кёре тохташдырылгъан налог ставкала азайтылгъандыла, займланы нулевой процент ставкаларын тохташдырыргъа къолдан келгенди, организацияланы ырысхыларындан алыннган налогну ставкалары тюшюрюлгендиле. Федерал налог службагъа эмда башха контроль-надзор органлагъа предпринимательлени тинтиуге, жууапха тартыу мадарла этиуге чек салыннганы – себеплик этиуню къыйматлы амалларыдыла,-деп чертгенди Николай Фёдоров.
Ирина Яровая пандемия келтирген хаталаны кетериуню жангы амалларын излерге кереклисин айтханды. Гитче эм орта бизнесге себеплик этиуню регионлада хайырланнган бек къыйматлы амалларын жаяргъа кереклисин чертгенди.
Жыйылыуда россейлилени къыралны кесинде туризм амалла бла жалчытыуну игилендириуню юсюнден да баргъанды. Санатор-курорт комплексни аягъы юсюне салыргъа кереклиси, къыралны жанындан анга болушлукъ изленнгени да чертилгенди.
Магъаналы жумушланы сюзюуге РФ-ни экономиканы айнытыу министрини орунбасары Татьяна Илюшникова, РФ-ни финансла министрини орунбасары Тимур Максимов,Туризм жаны бла федерал агентствону таматасы Зарина Догузова, къырал властьны федерал эмда регион органларыны башчылары бла келечилери къатышхандыла.