ГъащIэм къыщысэбэпыну IэщIагъэхэр щызрагъэгъуэт еджапIэ нэхъыфIхэм ящыщ зыщ Къэбэрдей-Балъкъэр «УхуакIуэ» колледжыр. ЕджапIэм щагъэхьэзыр цIыхубэ хозяйствэм и IэнатIэ куэдыр зыхуэныкъуэ, зэманым къигъэув мардэхэм тещIыхьауэ лэжьэфыну IэщIагъэлI­хэр. Апхуэдэхэщ, псалъэм папщIэ, автотранспортым, связымрэ коммуникацэмрэ, псэуалъэ, гъуэгу, аэродром ухуэным, пощтым, финанс IуэхущIапIэхэм я лэжьакIуэхэр.
Колледжыр нобэкIэ ефIакIуэ зэпытщ. абы иIэщ лабораторэр, компьютер классхэр, еджапIэ пэш зыхэт библиотекэ, еджакIуэхэр щыпсэу общежит зэгъэпэща, спорт, актовэ залхэр, стадион, узыншагъэм щыкIэлъыплъ пэш, шхапIэ. Республикэр зыхуэмыныкъуэ IэщIагъэ яхэткъым колледжым къыщIигъэкIхэм. Ахэр щылэжьэфынущ аэропортым, автотранспортым, ухуэныгъэ комп­лексхэм, электростанцхэм, щыты­фы­нущ гараж унафэщIхэу, прорабу, бухгалтеру.
Колледжым и зэIузэпэщыгъэри, абы щылажьэ егъэджакIуэхэмрэ ще­джэхэмрэ дэрэжэгъуэ яIэнри куэдкIэ елъытащ унафэщIым. Илъэс куэд щIауэ гупым я пашэщ къыдэлажьэхэми еджапIэм щIэсхэми фIыуэ къа­лъагъу Сунш Заудин.
ЩIалэгъуалэм IэщIагъэ щызрагъэгъуэт еджапIэхэм къыщагъэсэбэп ­хъуа «Вордскиллс» дунейпсо зэщIэ­хъееныгъэм «УхуакIуэм» щеджэ ныбжьыщIэхэми я Iэзагъыр къыщагъэ­лъагъуэ. Колледжыр сыт и лъэны­къуэкIи зэпэщауэ зэрыщытым и зы щапхъэщ гъуэгу тетыныр къытрамыгъэхьэлъэу еджакIуэхэм зы­щыпсэун пэш зэрыхухахыр. Ко­лледжым щIалэгъуалэм къарит Iэ­щIагъэхэр но­бэкIэ щIыналъэр зыхуей, зыхуэныкъуэ защIэщ, ар къэзыуха дэтхэнэри IэнатIэншэу къэнэнукъым. Лэжьэну зигу илъ дэтхэнэри ягъасэ, адэкIэ зи щIэныгъэм хэзыгъэхъуэну хуейхэми гъуэгу ират.