КIуэкIуэ Казбек Къэбэрдей-Балъкъэрым и Правительствэм хэтхэм бадзэуэгъуэм и 10-м зэIущIэ ядригъэкIуэкIащ.
Видеоконференц мардэм тета зэIущIэм щыхэплъэжащ Къэбэрдей-Балъкъэрым социально-экономикэ и лъэныкъуэкIэ щIышылэ - мэкъуауэгъуэ мазэхэм къриубыдэу зэрызиужьа щIыкIэм, апхуэдэуи коронавирус узыфэ зэрыцIалэм зэрызиубгъуам къыдэкIуа гугъуехьхэм япэщIэту, япэ игъэщыпхъэ къалэнхэр щIыналъэм и экономикэм, социальнэ IэнатIэм щыгъэзэщIэным хуэунэтIа Iуэхухэм зэрехъулIэм.
ЗэIущIэр къыщызэIуихым КъБР-м и Iэтащхьэм къыхигъэщащ илъэсым и етIуанэ мазищыр зэрыщыту Къэбэрдей-Балъкъэрым коронавирус узыфэ зэрыцIалэм ебэныным зэрытригъэкIуэдар. Иджы щытыкIэр хэпщIыкIыу ефIэкIуэжащ, республикэм щагъэува мардэ ткIийхэр хуэм-хуэмурэ Iуахыж. Экономикэм и IэнатIэ псоми лэжьэн щIадзэжауэ жыпIэ хъунущ. «Иджы гулъытэ хэха хуэщIыпхъэщ республикэм адэкIэ зегъэужьыным икIи пандемием къиша хэщIыныгъэхэр иригъэкъужыныр зэтеухуапхъэщ, къэралым и Президентым къыхилъхьа лэжьэкIэщIэхэр, унэтIыныгъэщIэхэр къэлъытауэ», - жиIащ КIуэкIуэ Казбек.
«COVID-19-м дызригъэува щытыкIэр икъукIэ гугъуу щытами, къэралми, зэрыщыту дунейми я экономикэхэм я IэнатIэ куэдым щIэгъэхуэбжьауэ заужьыным хуэщхьэпауэ къэплъытэ хъунущ. Сату щIэным, Iуэхутхьэбзэхэр зэфIэгъэкIыным, лэжьыгъэ IэнатIэщIэхэр къызэIухыным ехьэлIа Iуэхухэр щIэм тету къызэрагъэпэщ. Иджыпсту икъукIэ мыхьэнэшхуэ иIэщ адрейхэм дакъыкIэрымыхуу а лэжьыгъэм дыхыхьэным, экономикэмрэ социальнэ IэнатIэмрэ къэIэтыжыным хуэунэтIауэ къыкъуэкIа Iэмалхэр къэгъэсэбэпыным. Апхуэдэ хэкIыпIэхэр щыщыIэщ узыншагъэр хъумэнымкIэ, егъэджэныгъэмкIэ IэнатIэхэм, хьэрычэт Iуэху мыинымрэ курытымрэ, IT-кластер, технологие лъагэхэр зи лъабжьэ IуэхущIапIэхэр къызэгъэпэщынымрэ абыхэм зегъэужьынымрэ, республикэм и мэкъумэш IэнатIэм къыщалэжьхэр щIыналъэщIэхэм щыщэным, къэрал кIуэцI туризмэм зегъэужьыным епха унэтIыныгъэхэм.
КъБР-м и Правительствэм къызэритамкIэ, 2020 гъэм и мазихым республикэм псори зэхэту хэхъуэу иIащ сом мелард 19,5-рэ, ар илъэс псом зрагъэхъулIэну зытращIыхьам и процент 49,6-рэ мэхъу. Илъэс кIуам и апхуэдэ лъэхъэнэм хэхъуэу иIам елъытауэ, мыгъэрейр проценти 126-рэ ирокъу. Апхуэдэу щытми, бюджетым езым и хэхъуэхэр (налогхэмрэ налогыу щымытхэмрэ) 2019 гъэм и иджы хуэдэ пIалъэм ирихьэлIэу яIар процент 89,5-м нэсу къехащ.
2020 гъэм бадзэуэгъуэм и 1-м ирихьэлIэу хэщIу яIар, илъэс кIуам и апхуэдэ зэманым елъытауэ, процент 18,5-кIэ нэхъыбэщ. ХэщIым и процент 80-р социальнэ мыхьэнэ зиIэ, япэ игъэщыпхъэ къалэнхэр зэфIэгъэкIыным хухахащ. Ахэр трагъэкIуэдащ цIыхухэм ирата социальнэ дэIэпыкъуныгъэхэм, лэжьапщIэр тыным, коммунальнэ Iуэхутхьэбзэхэмрэ связымрэ яхуэзэ пщIэр хэлъхьэным, хущхъуэхэр, ерыскъыпхъэхэр къэщэхуным, муниципальнэ зэгухьэныгъэхэм я бюджетхэм бюджетзэхуаку трансфертхэр къахузэщIэгъэуIуэным, лэжьапIэ Iумытхэм фIэкIыпIэншэ медицинэ страхованэм и Iуэхутхьэбзэхэр яхуэщIэным.
Промышленнэ IуэхущIапIэхэм къыщыщIагъэкIахэр, зэкIэ зэрыхуагъэфащэмкIэ, илъэс кIуам и иджы хуэдэ лъэхъэнэм зэрыщытам елъытауэ проценти 110,7-рэ, мэкъумэш IэнатIэм къыщалэжьар - проценти 102-рэ, ухуэныгъэм IэнатIэм - проценти 100,8-рэ, мылъку нэхъыщхьэм инвестицэу къыхалъхьар - проценти 101-рэ, КъБР-м нэгъуэщI щIыналъэхэм сатууэ щищIар - проценти 149-рэ хъунущ. ПсыхэкIыу, щыгъыну, гъущIым къыхэмыщIыкIа продукцэу, компьютеру, электроннэ, оптикэ Iэмэпсымэу, электрокъарукIэ лажьэ оборудованэу, автотранспорту, прицепрэ прицеп ныкъуэу къыщIагъэкIхэм хэхъуащ.
Лъэпкъ проектхэмрэ къэрал программэхэмрэ гъэзэщIэнми пащэ.
А псоми къадэкIуэу, коронавирус узыфэ зэрыцIалэм земыгъэубгъуным яужь зэритым къыхэкIыу, 2020 гъэм и япэ илъэс ныкъуэм сатууэ ящIар зэрыхъунур процент 91,2-рэ хуэдизщ, цIыхухэм пщIэкIэ хуащIэ Iуэхутхьэбзэхэр процент 88,9-м нэсыну аращ. ХуэдитIым щIигъукIэ нэхъ мащIэ хъуащ щIыналъэм туристу къакIуэхэм я бжыгъэр. ХьэрычэтыщIэ IуэхущIапIэхэр процентитIкIэ нэхъ мащIэ хъуащ.
Республикэм щыпсэухэм къэрал дэIэпыкъуныгъэ папщIэу къыхуаутIыпщ мылъкур зыхуэфащэхэм зэрытрагуашэм и гугъу ищIу зэIущIэм къыщыпсэлъащ КъБР-м лэжьыгъэмрэ цIыхухэм социальнэ и лъэныкъуэкIэ къащхьэщыжынымкIэ и министр Асанов Алим.
Апхуэдэу, цIыху щхьэхуэхэм зэрызыщIагъакъуэ социальнэ мылъкуу япэ илъэс ныкъуэм къагъэсэбэпащ сом меларди 3,5-м щIигъу. Ар 2019 илъэс псом а Iуэ-хум хухаха мылъкум щIегъу. Социальнэ дэIэпыкъуныгъэ папщIэу цIыхухэм иратыр илъэсым и кIэ пщIондэ псори зэхэту сом меларди 7,8-м нагъэсыну я мурадщ.
Сабийхэм ират ахъшэр яIэрыхьащ цIыкIу мин 60 хуэдизым, гъэ кIуам и иджы хуэдэ пIалъэм ирихьэлIэу апхуэдэ гулъытэ зыгъуэта сабийхэм нэхърэ мин 90-кIэ нэхъыбэм.
Мазэ къэс ират ахъшэр цIыхухэм яIэрыгъэхьэн папщIэ нэхъ пасэу ягъэувауэ щыта пIалъэм къыпащащ 2020 гъэм жэпуэгъуэм и 1 пщIондэ.
ЦIыхур псэун папщIэ нэхъ мащIэ дыдэу зыхуей ахъшэм хуэдиз дэтхэнэми щахуэмызэ унагъуэхэм щапI сабийуэ зи ныбжьыр илъэсищым къыщыщIэдзауэ илъэсибл хъухэм 2020 гъэм щIышылэм и 1-м къыщыщIэдзауэ мазэ къэс сом 6853,5-рэ иратыну ягъэуващ. Мы гъэм апхуэдэ ахъшэ яIэрыхьэнущ сабий мин 24-кIэ нэхъыбэм.
УФ-м и Пенсэ фондым и къудамэу КъБР-м щыIэм къызэритамкIэ, илъэси 3-м къыщыщIэдзауэ илъэс 16 хъухэм зэ тыгъуэу сом мин пщIырыпщI иратыным теухуауэ щыIэ унафэм ипкъ иткIэ, ныбжьыщIэ 148241-м а ахъшэр иратащ, псори зэхэту сом мелард 1,4-рэ хуэзэу. Зэ тыгъуэу сом мин тхурытху хуаутIыпщащ сабий къалъхуагъащIэхэм я деж къыщыщIэдзауэ илъэсищ хъухэу 31875-м, псори зэхэту сом мелуан 221,2-рэ текIуадэу.
Я псэупIэхэр ирагъэфIэкIуэн папщIэ КъБР-м и республикэ бюджетым щыщу зэ тыгъуэу сом мин 250-рэ дэтхэнэ унагъуэми хуэзэу иратащ сабиитху е нэхъыбэ зиIэ зэщхьэгъусэ 89-м.
Экономикэмрэ социальнэ IэнатIэмрэ щытыкIэ гугъум зэритым къыхэкIыу Къэбэрдей-Балъкъэрым нэхъри щызэпэубыда хъуащ лэжьапIэ IэнатIэхэр.
А Iуэхум теухуауэ къата бжыгъэхэм къызэрагъэлъагъуэмкIэ, IэнатIэ къыхуагъуэтыну щIэлъэIуу КъБР-м цIыхухэр лэжьыгъэкIэ къызэгъэпэщынымкIэ и IуэхущIапIэхэм 2020 гъэм и щIышылэм къыщыщIэдзауэ бадзэуэгъуэ пщIондэ зыхуагъэзащ цIыху мин 61-м. ЛэжьапIэншэу къалъытащ мин 43,5-рэ, абыхэм ящыщу мин 41-м я IэнатIэхэр яфIэкIуэдащ мы илъэсым и гъатхэпэ мазэм къыщыщIэдзауэ. Ар хуэди 8,5-кIэ нэхъыбэщ, 2019 гъэм и иджы хуэдэ лъэхъэнэм елъытауэ. Закъыхуэзыгъэзахэм я процент 90-м, лэжьапIэншэу зэрыщытым къыхэкIыу, абы пэкIуэ дэIэпыкъуныгъэ ират.
КъБР-м и Iэтащхьэм и унафэхэм япкъ иткIэ, 2020 гъэм гъатхэпэм и 1-м къыщыщIэдзауэ лэжьапIэншэу къалъыта, абы папщIи IэнатIэншэм нэхъ мащIэ дыдэу иратым хуэдиз фIэкIа зыIэрымыхьэ цIыху 14768-м республикэ бюджетым щыщу мэлыжьыхь - накъыгъэ мазэхэм зэ тыгъуэу хуагъэхьащ сом мин тхурытху - псори зэхэту абы трагъэкIуэдащ сом мелуан 75-рэ хуэдиз.