Тюнене Къабарты-Малкъаргъа Россей Федерацияны промышленность эмда сатыу-алыу министри Денис Мантуров жумуш бла келгенди. Федерал къуллукъчу медицина рентген оборудование чыгъаргъан «Севкаврентген-Д» предприятияны жокълап, аны иши бла шагъырейленнгенди.
Бу предприятияда 2008 жылдан бери уллу тюрлениуле этиледиле, ол санда жангы цифралы эмда инновациялы технологияла, производство эмда финанс ишлени автоматизацияланнган амаллары сингдириледиле. Денис Мантуров рентген оборудование жыйышдырылгъан эмда башха цехледе да болгъанды, заводну производство кючюне бек бюсюрегенин да айтханды. «Бу предприятиягъа 60 жылдан артыкъ болгъанлыкъгъа, аны производство онглары шёндюгю заманнга толу келишедиле. Бек башы уа - «Севкаврентген-Д» заводну кесини конструктор бюросу барды эмда кёп къыйын ишлени ол кеси тамамлайды, ол санда программалы жалчытыуну бардырады, оборудованияны схемотехника жумушларын да тындырады. Предприятие жууукъ тыш къыралла бла сатыу-алыу бардырады, ол санда «Халкъла аралы кооперация бла экспорт» миллет проектни эмда Сатыу-алыу представительстволаны юслери бла», - дегенди.
Ол кюн КъМР-ни Башчысы Казбек Коковну бла Денис Мантуровну араларында эки жанлы тюбешиу да болгъанды. Аны кезиуюнде сюзюлген баш темаладан бири Тырныауузда вольфрам-молибден магъаданны къазыуну эмда жарашдырыуну инвестиция проектин жашауда бардырыу да болгъанды. «2023 жылны ахырына дери Тырныаууздагъы комбинатдан хазыр продукт алыр умутлубуз»,- деп чертгенди федерал къуллукъчу.
КъМР-ни Башчысы уа министрге регионнга эс бургъаны эмда себеплик этгени ючюн жюрек ыразылыгъын билдиргенди. «Предприятияны иши бла шагъырейленнгенигиз, хар оноучу бла ушакъ этгенигиз, ахшы амаллагъа юйретгенигиз ючюн сау болугъуз. Бюгюннгю тюбешиу Къабарты-Малкъарда промышленностьну айнытыуда алгъа атлам этерге кёллендирликди. Бизни бирге ишлеуюбюз мындан ары да хайырлы болур ючюн биз да къолубуздан келгенни аярыкъ тюйюлбюз»,- деп чертгенди Казбек Коков.
Денис Мантуров регионну промышленность предприятияларыны кёрмюч экспозициялары бла да шагъырейленнгенди. Республиканы экспортуну битеу ёлчеминде сырьёгъа саналмагъан эмда энергетикалы болмагъан продукция 100 процент чакълы бирни тутханына эс бургъанды. Аллай продукцияны экспортун кёбейте барыу «Халкъла аралы кооперация бла экспорт» миллет проектде белгиленнген баш магъаналы борчладан бири болгъанын эсге салгъанды.
Ол дагъыда 2020 жылда, пандемиягъа да къарамай, Россейни Минпромторгу экспортёрлагъа болушууну платформасын къурагъанын, шёндюден окъуна аны бла 2 мингнге жууукъ экспортёр хайырланнганын билдирип, Къабарты-Малкъарны тийишли компанияларын ол ишге къошулургъа чакъыргъанды.