Къэбэрдей-Балъкъэрым и Iэтащхьэ КIуэ­кIуэ Казбек мэкъуауэгъуэм и 27-м лэ­жьыгъэ IуэхукIэ Бахъсэн къалэм щыIащ. Республикэм и Iэтащхьэм зыхигъэ­гъуэзащ Урысей Федерацэм и Конституцэм хуащI зэхъуэкIыныгъэхэмрэ хэлъхьэ­ныгъэхэмрэ ехьэлIа IэIэтым зэрызыхуа­гъэ­хьэзырым. Абы папщIэ КIуэкIуэ Казбек щыIащ Дыгулыбгъуей къуажэм къыщызэ­рагъэпэща хэхакIуэ комиссэ №39-м и участкэм. Iэ зыIэтынухэм узыншагъэмкIэ я шынагъуэншагъэм кIэлъыплъын папщIэ Роспотребнадзорым и чэнджэщ псори а щIыпIэм щагъэзащIэ: цIыхухэр куэду зэхуэ­мызэн папщIэ Iэмалхэр щыIэщ, медицинэ нэкIуIупхъуэхэр, Iэлъэхэр, дезинфекцэ зэ­ращI Iэмэпсымэхэр ятынущ. Дыгулыбгъуейдэсхэм нэхъапэм Къэбэрдей-Балъкъэрым и Iэтащхьэм зыхуагъэзат къуажэм щэнхабзэмкIэ и унэр зэгъэ­пэ­щы­жынымкIэ закъыщIигъэкъуэну. КIуэкIуэ Каз­бек къыхигъэщащ абы и лъэныкъуэкIэ лэжьыгъэхэр зэрекIуэкIыр икIи нобэм ирихьэлIэу объектым и проект-сметэ документацэр зэрыхьэзырыр. КъБР-м и Iэтащхьэр кIэлъыплъащ ТекIуэныгъэм и уэрамым лэжьыгъэхэр зэрыще­кIуэкIми. Абы и гъуэгур зэгъэпэщыжыным мылъку хухихащ республикэм и гъуэгу фондым. Объектым и кIыхьагъыр километр 4,4-рэ ирокъу. Бахъсэн къалэ администрацэм и Iэтащхьэ Мамхэгъ Хьэчим КIуэкIуэ Казбек щигъэгъуэзащ Дыгулыбгъуей къуажэм пэ­гъунэгъуу хабзэм къемызэгъыу къыщыу­нэ­хуа пхъэнкIиидзыпIэр здэщыIа щIыпIэр зэIуэзэпэщ зэращIыжымрэ щIыналъэм и бжэIупIэхэр зэрырагъэфIакIуэмрэ.