Наркоманиемрэ наркотикхэр щэнымрэ ебэныным и дунейпсо махуэм видеоконференц мардэм тету зэхэтащ Наркотикхэр хабзэншагъэкIэ зэрызэрагъэкIуэкIым ебэнынымкIэ къэрал комитетым и зэIущIэ. Ар иригъэкIуэкIащ Урысей Федерацэм къэрал кIуэцI IуэхухэмкIэ и министр, полицэм и генерал Колокольцев Владимир. Абы и лэжьыгъэм хэтащ Къэбэрдей-Балъкъэрым и Iэтащхьэ КIуэкIуэ Казбек.
Урысейм и МВД-м и унафэщIыр тепсэлъыхьащ зыхэплъэ Iуэхум теухуауэ къэралым щыщыIэ щытыкIэр зыхуэдэм:
«Хьэпшыпхэмрэ хьэлъэхэмрэ зэрагъэIэпхъуэм кIэлъыплъыным и Iуэхур щагъэткIия мы лъэхъэнэм хэпщIыкIыу нэхъ мащIэ хъуащ Урысей Федерацэм и щIыналъэм хамэ къэралхэм щащIауэ щэхуу къашэ наркотикхэр. Абы къишащ къэралым синтетикэ афиянхэкIхэу нэхъыбэ щащIыныр. Дызэрыт илъэсым и япэ мазищым къэрал кIуэцI Iуэхухэм- кIэ органхэм афиянхэр щащI апхуэдэ лабораторэу хыщIым нэблагъэ къахутэри, ахэр зэхуащIащ, ар илъэс кIуам и апхуэдэ лъэхъэнэм елъытауэ процент 44-кIэ нэхъыбэщ».
Щапхъэ папщIэу Колокольцев Владимир къихьащ Москва областым мефедрон препаратыр щэхуу къыщыщIагъэкI лабораторэ къыщызэзыгъэпэща гуп къызэрыщIагъэщар икIи абыхэм зэтраухуа Iуэхур къызэрызэпаудар:
«Абыхэм къыкъуаха афиянхэкIхэм зэуэ зрахьэлIэ дозэ минищэрэ тхущIрэ къыхэкIынут, абыкIэ гъэпщкIуауэ сату зыщIхэм сом мелуанищэм щIигъу къыщIахыфынут».
Министрым къыхигъэщащ властым и федеральнэ, щIыналъэ органхэр афияныр лъабжьэ зыхуэхъу щIэпхъаджагъэхэм зэкъуэту пэщIэтын зэрыхуейр, апхуэдэуи дунейм и адрей къэралхэм а IуэхумкIэ хуаIэ пыщIэныгъэр зэрыгъэбыдапхъэр.
НаркотикхэкIхэр зэрызэрагъэкIуэкIым пэщIэтыным хуэгъэза урысей полити-кэм и унэтIыныгъэ нэхъыщхьэхэм я лъабжьэр абы ехьэлIауэ дуней псом щызекIуэ хабзэхэрщ, илъэс кIуам и гъатхэпэм ООН-м иригъэкIуэкIа 62-нэ сессием къыщащта кIэух декларацэм иубзыхуарщ.
Абы къыдэкIуэу, зэIущIэм хэтхэр зэреплъымкIэ, языныкъуэ къэралхэм «афиян мыхьэлъэ» жыхуаIэхэр къагъэсэбэпыну хуит зэращIыр дунейпсо зэгурыIуэныгъэхэм я лъабжьэхэр къэзыгъэтIасхъэщ, нэхъыщхьэращи - цIыхухэм, псом хуэмыдэу щIалэгъуалэм, я узыншагъэм зэран хуохъу, апхуэдэ Iуэху бгъэдыхьэкIэм емыувалIэ адрей къэралхэм я Iуэху еплъыкIэр мытэмэм хуэдэу къыщIрегъэдз.
Абы нэмыщI, зэIущIэм щыхэплъэжащ наркотикхэр зэрызэрагъэкIуэкIым ебэныным, абы кIэлъыплъыным теухуа лэжьыгъэр 2019 гъэм къэралым зэрыщекIуэкIам кърикIуахэм икIи Урысей Федерацэм и Президентым илъэс къэс хуагъэхь докладым и проектыр къащтащ. Абы щызэпкърыхащ наркотикым пэщIэтынымкIэ къэрал политикэм и унэтIыныгъэ нэхъыщхьэхэр.
Колокольцев Владимир къыхигъэщащ:
«Наркотикхэр хабзэншагъэкIэ зэрызэрагъэкIуэкIым пэщIэт федеральнэ, щIыналъэ комиссэхэр зэрызэдегугъуам и фIыгъэкIэ илъэс кIуам тхузэфIэ- кIащ щытыкIэм фIы и лъэныкъуэкIэ зедгъэхъуэжыныр. Наркотикхэр щэным пыщIа щIэпхъаджагъэхэр проценти 9,5-м нэблагъэкIэ нэхъ мащIэ хъуащ, наркомание узыфэр зэфыкIхэри проценти 5-кIэ нэхъ мащIэщ».
Мы зэманым и кIэм нэблэгъащ СтратегиещIэ зэхэлъхьэным теухуа лэжьыгъэр, абы 2030 гъэм нэсыху зэфIагъэкIын хуейхэр къызэщIиубыдэнущ: а Iуэхум жылагъуэр трагъэпсэлъыхьащ, коррупцэм пэщIэтын и лъэныкъуэкIи экспертизэ ирагъэкIуэкIащ, ар зэхьэлIа IуэхущIапIэхэм я нэхъыбапIэр абы арэзы зэрытехъуэр жаIащ.
Зытепсэлъыхьа Iуэхухэм ящыщщ никотин зыхэлъ, ауэ тутын папщIэу къамыгъэсэбэп зэхэлъхэр зэрызэрагъэкIуэкIыр къэралым и нэIэ щIэтыным теухуари. Наркотикхэр хабзэншагъэкIэ зэрызэрагъэкIуэкIым ебэнынымкIэ къэрал комитетым и унафэщIым зэхуэсым хэтхэр щыгъуазэ ищIащ а унэтIыны- гъэм щрагъэкIуэкIа къэпщытэныгъэхэм кърикIуахэм:
«Роспотребнадзор»-м и щIыналъэ органхэм, Прокуратурэ нэхъыщхьэм, Урысейм и МВД-м, Следственнэ комитетым я лIыкIуэхэр щIыгъуу, къэпщытэныгъэ мин щитIым щIигъу ирагъэкIуэкIащ, яубзыхуахэм нэмыщI, щIыпIэхэм кIуэурэ зэхагъэкIа Iуэху мин хыщI хуэдизри абыхэм яхэту. Абы и фIыгъэкIэ, никотин зыхэлъ, тутын папщIэу къамыгъэсэбэп продукцэу сату щIыпIэхэм щызэрагъэкIуэкIыр хэпщIыкIыу нэхъ мащIэ хъуащ».