Къэбэрдей-Балъкъэрым и Iэтащхьэ КIуэкIуэ Казбек видеоконференц мардэм тету дыгъуасэ иригъэкIуэкIащ ­коронавирус уз зэрыцIалэм республикэм зыщемыгъэубгъуным хуэунэтIа лэ­жьыгъэхэр къызэрызэрагъэпэщымрэ а узыфэм зэрыпэщIэтымрэ теухуа Iуэху­хэр зэкIэлъызыгъакIуэ Оперативнэ штабым и зэIущIэр.
Абы зыщытепсэлъыхьыну яубзыхуа ­Iуэхугъуэ нэхъыщхьэхэу и гугъу ящIащ щIыналъэм щыщыIэ санитар-эпидемиологие щытыкIэм, узыншагъэр хъумэным епха IуэхущIапIэхэм я лэжьэкIэм, COVID-19 узыфэр зыпкърытхэу поликлиникэхэм зыщызыгъэхъужхэр хущхъуэхэмкIэ къызэгъэпэщыным.
КIуэкIуэ Казбек къыхигъэщащ коронавирус уз зэрыцIалэм республикэм зэры­зыщиубгъум и гугъу пщIымэ, щытыкIэр иджыри зэрызэпIэзэрытыр, ауэ икIи иджыри узыгъэгузавэу зэрыщытыр. Узыр зэуэлIахэм я бжыгъэр зэкIэ нэхъ мащIэ хъуркъым. Республикэм и УнафэщIыр едэIуащ къыхалъхьа Iуэхухэр зи нэIэ щIэтыныр зи къалэнхэм щытыкIэм теухуауэ жаIахэм.
КъБР-м санитар дохутыр нэхъыщхьэу щыIэ Пагуэ Жыраслъэн зэрыжиIамкIэ, мэкъуауэгъуэм и 15-м ирихьэлIэу республикэм COVID-19 узыфэр цIыху 3975-м япкърыту щатхащ, абыхэм ящыщу 1962-р хъужащ, цIыху 39-рэ узыфэм илIыкIащ. Сымаджэщхэм щIэлъщ цIыху 1289-рэ, абыхэм ящыщу 55-м реанимацэм щоIэ­зэ, ИВЛ аппаратхэмкIэ цIыху 22-рэ ягъэбауэ. Амбулаторэхэм щагъэхъуж сымаджэ 1176-рэ. Узыфэ зэрыцIалэр къы­зэ­режьэрэ тест ирагъэтащ цIыху мин 67-м щIигъум, КТ-къэпщытэныгъэм цIыху мини 10-м щIигъу пхыкIащ.
КъБР-м узыншагъэр хъумэнымкIэ и ­министр Къалэбатэ Рустам жиIащ Къэбэрдей-Балъкъэрым мы зэманым ирихьэлIэу COVID-19 узыфэр зыпкърытхэм щы­щеIэзэ сымаджэщиблым гъуэлыпIэу 1583-рэ зэрыщIэтыр, абыхэм ящыщу ­721-р сымаджэхэр кислородкIэ зэрагъэбауэ IэмэпсымэкIэ къызэгъэпэщащ. Иужьрей зэманым нэхъ тэмэму къалъыта чэнджэщхэм тету, госпиталхэм щIагъэ­гъуэлъ щхьэусыгъуэхэр нэхъыбэ ящIащ. Иджы сымаджэщхэм ягъэгъуэлъ узыфэр нэхъ къызэхьэлъэкIынкIэ хъуну къалъытэ гупым хэтхэмрэ зи ныбжьыр илъэс 65-м щIигъуахэмрэ, я тхьэмбылым узыр зэран зэрыхуэхъуа процент бжыгъэм емылъы­тауэ.
Госпиталхэм щолажьэ дохутыр 257-рэ, медицинэ лэжьакIуэ курытрэ нэхъыщIэу 683-рэ. Ахэр лэжьапIэ нэужьым санаторэхэмрэ медицинэ IуэхущIапIэхэм епха общежитхэмрэ щIэсщ.
Урысейм Промышленностымрэ сатумкIэ и министерствэм иращIылIа зэгу­ры­Iуэныгъэм ипкъ иткIэ КъБР-м узыншагъэр хъумэнымкIэ и IуэхущIапIэхэм ­къаIэрыхьащ С классым хыхьэ медицинэ дэIэпыкъуэгъу псынщIэ автомобилу хы. Апхуэдэ машинэу иджыри тху къаIэры­хьэнущ мыгувэу.
КIуэкIуэ Казбек къыхигъэщащ амбу­латорэхэми щыIэ хъуа гугъуехьыр зэратещIэр. Мыхьэнэшхуэ зиIэ къалэну къигъэуващ COVID-19-р зыпкърытхэм унэхэм щеIэзэным. Абыхэм ящыщ псоми яхузэ­фIэкIынукъым зэрызагъэхъужыну хущ­хъуэхэр къащэхуну.
Абы къыхэкIыу, щIыналъэм и Iэтащ­хьэм къалэну къигъэуващ КъБР-м и республикэ бюджетым къыхэкIыу сом мел­уан 17 хуаутIыпщыну COVID-19 узыфэр зыпкърытхэу поликлиникэхэм зыщызыгъэхъужхэм коронавирус узыфэм пэлъэ­щыну къалъытэ хущхъуэхэр кърыхуащэ­хуным трагъэкIуэдэну. А Iэмалыр сэбэп хъунущ сымаджэхэм якIэлъыплъынымкIэ, апхуэдэуи узыфэр нэхъри мыетэ­нымкIэ. КъБР-м Узыншагъэр хъумэнымкIэ и министерствэм зыхуэфащэ IуэхущIапIэхэм зэгурыIуэныгъэ ярищIылIащ хущхъуэ комплекту 1000 къыхурагъэ­шэ­ным теухуауэ, ахэр зэман гъунэгъум республикэм къыIэрыхьэнущ. Иджыри апхуэдэ комплекту 1000 къащэхуну я мурадщ.
КъБР-м и Правительствэм и УнафэщI Мусуков Алий къихьащ илъэс дызэры­-тым и япэ мазитхум республикэм къы­щалъ­хуахэмрэ дунейм щехыжахэмрэ ­ятеухуа бжыгъэхэр къызыхэщ статистикэр. Ап­хуэдэу, 2020 гъэм и щIышылэ - накъыгъэ мазэхэм къриубыдэу щIы­налъэм къыщалъхуащ сабий 4120-рэ, ар 146-кIэ (проценти 4-кIэ) нэхъыбэщ илъэс кIуам и апхуэдэ лъэхъэнэм елъытауэ. Абы къы­дэкIуэу, ипэ ита илъэсхэм нэхъ мащIэ щыхъуауэ щытащ КъБР-ми ­къэ­ралми къыщалъхум я бжыгъэр. Дунейм ежыхахэм я бжыгъэр а пIалъэ дыдэм ­къриубыдэу цIыху 3023-рэ хъуащ, ар илъэс кIуам и апхуэдэ зэманым ­ирихьэлIэу зэрыщытам нэхърэ 252-кIэ ­(проценти 8-кIэ) нэхъ мащIэщ. Апхуэдэ щIыкIэкIэ, Къэбэрдей-Балъкъэрым щып­сэухэм къахохъуэ сабийуэ къыщалъ­хумкIэ.