РФ-ни эл мюлк министрини биринчи орунбасары Джамбулат Хатуов, аграрчыланы быйыл эл мюлк техника эмда оборудование бла жалчытыугъа жоралап, видеоконференция бардыргъанды. Анга КъМР-ни эл мюлк министри Хасан Сижажев да къатышханды, деп билдиргендиле ведомствону пресс-службасындан.
Жыйылыуда айтылгъаннга кёре, быйыл биринчи беш айны ичинде Къабарты-Малкъарда сатып алыннган эл мюлк техниканы саны 43 болгъанды. Аладан 39 – тракторладыла, къалгъан тёртюсю уа – комбайнла. Былтырны бу кезиую бла тенглешдиргенде, ёсюм 2,6 кереге жетгенди.
Сагъынылгъан техникадан биришер комбайн бла диск агрегат эмда эки трактор «Росагролизинг» акционер обществону болушлугъу бла алыннгандыла. Аланы багъасы онсегиз миллион сомду. Тенглешдирип айтханда, былтыр бу кезиуде «Росагролизингден» аграрчылагъа алты миллион сом багъасы юч эл мюлк машина келген эди.
-Агропромышленность комплексни инновациялагъа таянып айнытыугъа Къабарты-Малкъарда уллу бийик магъана бериледи. Быллай техниканы жангыртыу да тири барады. Бюгюнлюкде республикада тёрт мингден артыкъ трактор эмда жети жюз чакълы комбайн бардыла. Этилгени бла чекленип къалмай, мюлк -техника базаны кючлендириу иш андан ары бардырыллыкъды, - деп чертгенди Хасан Сижажев.