12 июньда Россейни кюнюн белгилеуню чеклеринде журналистле «Россей бла биргебиз» деген акцияны бардыргъандыла. Анга уллу къыралны битеу регионларыны басма, телевидение, радио, асламлы информация органларында уруннганла къатышхандыла, ол санда бизни республиканы журналистлери да.
Ала Россейни байрагъын алып суратлагъа тюшгендиле, артда видеоролик да къураллыкъды. Ол архивде сакъланырыкъды эм кюзде боллукъ фестивальда кёргюзтюллюкдю.
Россейни Журналистлерини союзуну Къабарты-Малкъарда бёлюмюню башчысы Шауаланы Разият белгилегенича, аллай магъаналы байрамгъа тау этекледе, табийгъатны ариу жерлеринде суратлагъа да тюшерге боллукъ эди. Алай коронавирус бла тохташхан къыйын болум ючюн быйыл аллай жолоучулукълагъа чыкъмазгъа оноу этилгенди.
Ауругъанланы саны азаймагъаны бла байламлы Шауаланы Разият адамланы низамгъа къаты болургъа да чакъыргъанды. «Жарсыугъа, биз уллу кёллюлюк этерге да сюйюучюбюз. Юйюбюзде абаданыбыз, гитчебиз болмагъан хазна инсан жокъду. Кесигизни сакълагъыз, жууукъларыгъызны аягъыз, сакъ болугъуз», – дегенди ол.