КъМР-ни Башчысы Казбек Коков видеоконференция халда Къабарты-Малкъар Республикада Коронавирус жукъгъан аурууну болдурмау эм аны жайылыууна контроль амалланы бардырыу оператив штабны кенгешин къурагъанды. Регионда санитар-эпидемиология болумгъа, медицина организацияланы ишлерине къаралгъанды.
КъМР-ни Башчысы белгиленнген соруула бла байламлы жууаплы адамланы оператив информацияларына тынгылагъанды. Жукъгъанланы эм тест этдирген гражданланы санларыны юсюнден Роспотребнадзорну таматасы Жирослан Пагов айтханды. 5 июньнга COVID-19 жукъгъан ауруу 3199 инсанда тохташдырылгъанды, аладан 1502-си къайтышхандыла, ауушханла 29 боладыла. Госпитальлада 950 саусуз турадыла, аладан 294-сю 65-жыллыкъла эм андан таматаладыла, реанимацияда 54 адам жатады.
Орталыкъ кёрюмдю бла айтханда, ахыр он кюннге суткагъа 60 инсан чакълы бирге госпитализация этилгенди. Амбулатор багъыуда 631 ауругъан турадыла, ышанлары билинмегенлей аурууну 1496 (49 процент) адам кётюредиле. Инфекция белгили болгъандан бери 51111 тестирование бла 7653 КТ-тинтиу этилгенди.
Казбек Коков белгилегенича, эпидемиология болум тохташыулу болгъанлыкъгъа, уллу ёсюуле эм жугъуула эсленмегенликге, саулукъ сакълау системагъа, санитар службагъа эм лабораториялагъа ауурлукъ бусагъатда бек уллуду. Келлик заманда эм магъаналы борчлагъа гражданла эм организацияла бла ангылатыу ишни бардырыу, урунуу эм социал коллективлеге инфекцияны кийирмеу, ишге келген заманда термометрия этиу, ауругъан бла тюбешгенни болжалгъа салмагъанлай таматалагъа билдириу эм сомоизоляция саналадыла.
КъМР-ни саулукъ сакълау министри Рустам Калибатов бюгюннге Къабарты-Малкъарда COVID-19 аурууну багъарча беш медицина учрежденияда 1283 ундурукъ, ол санда кислороду бла – 594, ИВЛ аппаратла бла жалчытылыннган да – 152 болгъанларын билдиргенди. Къошакъ жатар жерлени къыстырыгъы да барды.
Госпитальланы ишлерин 232 врач жалчытады, 611 орта эм гитче медицина ишчи. Медиклени хазырлау эм окъутуу иш бардырылады, ол санда COVID-19 жукъгъан аурууну интерактив модульлерине кёре. ИОМ-ну билген специалистлени битеулю саны 9859 адамды.
2-чи номерли ГКБ-да бла РДКБ-да больницалы болмагъан сабий эм абадан пневмонияланы багъыу бёлюмле ишлерин бардырадыла. Кюн сайын аллай клиникалы 30 адам чакълы бирге госпитализация этиледи, аладан 50 проценти 65 жылларындан атлагъан саусузладыла.
Къырал контрактланы эм спонсор ырысхыны хайырындан саулукъ сакълау махкемелеге изленнген энчи кърууланыу затланы тапдыргъанлай турадыла.
Андан сора да, эм къоркъуулу инфекцияланы госпиталына жеринден тепдирилирге боллукъ 3 рентген аппарат, саусузгъа мониторинг этген 8 аппарат, 150 кислородну мылылыгъын кётюрюучю, жууукълашмагъанлай санны иссилигин билдирген 45 ёнчелеучю эм 100 пульсоксиметр келтирилгенди. Федерал бюджетден ахчагъа 401 къошакъ точкагъа кислород бла жалчытыу система келтирилгенди эм тохташдырылгъанды.
Бюгюнлюкге кёллендириу перерасчётла бла тёлеуле этилген медицина ишчилени битеулю саны 5103 адамды, аладан 1915 специалист КъМР-ни Саулукъ сакълау министерствосуна бойсуннган 16 организациядандыла, 3188-си биринчи медицина-санитар звенодан бла стационарладан ишчиледиле. Бу соруу бла байламлы жумушлагъа министерство тохтаусуз къарагъанлай турады, «исси ызгъа» сёлешген эм къырал жумушла тапдыргъан порталда кеслерин белгилеген гражданлагъа энчи эс бурады.
Кенгешни чегинде Бир къырал экзаменни эм Россей Федерацияны Конституциясына тюзетиуле кийириу Битеуроссей къол кётюрюуню кезиулеринде санитар-эпидемиология къоркъуусузлукъну жалчытыу соруула да сюзюлгендиле.
КъМР-ни жарыкъландырыу, илму эм жаш тёлюню ишлери жаны бла министрни къуллугъун толтургъан Анзор Езаов 2020 жылда ЕГЭ берирча 27 пункт ишлеригин айтханды: 26 – билим бериу организацияланы мурдорларында, 1 – юйде. Аудиторияланы саны 358-ди. Роспотребнадзорну эсгертиулерине тийишлиликде битеу пунктлада къоркъуусузлукъну излемлери толтуруллукъдула: отоуланы дезинфекциялары, специалистлени бла экзамен бергенлени кирген заманда термометриялары, антисептикле бла жалчытылыныу, ЕГЭ-гъа къатышханланы, предмет комиссияланы экспертлерин бир бирден 1,5 метр узакълыкъда олтуртуу, суусап тапдырыу низам, медицина бригадаланы дежурстволары.
КъМР-ни Айырыу комиссиясыны таматасы Вячеслав Гешевни билдиргенине кёре, Къабарты-Малкъар Республиканы тийресинде битеуроссей къол кётюрюуге хазырланыуну эм аны бардырыуну 13 жер-жерли эм 355 участок айырыу комиссия жалчытырыкъдыла. Эсепге тюшген айырыучуланы саны 537 720 адамды.
Айырыулагъа къатышханланы саулукъларыны къоркъуусузлукъларын жалчытыр ючюн аны алгъадан бардырыу онгла боллукъдула: 2020 жылда 25 июньдан 1 июльгъа дери, отоудан тышында, бир бирге жууукълашмагъанлай юйде, эмда тургъан жерде. 5 июньдан заявленияланы алыу барады. Къол кётюрюу пунктлада да жууукълашмагъан низамны толтуруу болумла къураллыкъдыла, къол кётюргенлеге энчи кирген эм энчи чыкъгъан жерле жарашдырыллыкъдыла, температуралары ёнчеленирикди, медицина къапла, къол къапла, дезинфекция этген затла берилликдиле.
