КъБР-м и Премьер-министр Мусуков Алий иригъэкIуэкIащ Правительствэм и зи чэзу зэIущIэр. Ар видеоконференц мардэм тету къызэрагъэпэщащ.
ЗэIущIэм хэтахэр Iуэхугъуэ тIощIым щIигъум тепсэлъыхьащ. Абыхэм ящыщт республикэм и къэрал властым и органхэм къэрал программэхэр гъэзэщIэным хуэгъэзауэ 2019 гъэм зэфIагъэкIахэр. Абы и лъэныкъуэкIэ щIыналъэм и Iуэху зытетыр зэпкърихыу къэпсэлъащ КъБР-м экономикэ зыужьыныгъэмкIэ и министр Рахаев Борис.
Илъэс кIуам Къэбэрдей-Балъкъэрым щелэжьащ къэрал программэ 24-м, абыхэм ящыщу 17-м федеральнэ бюджетым щыщ мылъку хэлъщ. Программэхэр гъэзэщIэным трагъэкIуэдэну КъБР-м и бюджетым щаубзыхуат сом мелард 33,6-ри, ар федеральнэ бюджетым къыхэкIыу сом меларди 10,1-рэ, республикэ бюджетым ейуэ сом мелард 23,5-уэ зэхэлъщ.
Республикэ къэрал программэхэм хуаутIыпщакIэщ сом мелард 32,6-рэ (ар псори зэхэту трагъэкIуэдэнум и процент 96,8-рэ мэхъу). Бюджет мылъкуу къагъэсэбэпам и процент 70 хуэдизыр социальнэ унэтIыныгъэ зиIэ Iуэхухэр дэгъэкIыным хуаутIыпщащ.
КъБР-м и къэрал программэхэм я нэхъыбапIэм мылъкур хуаутIыпщакIэщ - яубзыхуам и процент 90-м щIигъур яIэрыхьащ къапэщыт къалэнхэр иризэфIахын папщIэ. Ар иужьрей илъэсхэм яхузэфIэкIауэ щыта бжыгъэхэм йофIэкI.
ЗэIущIэм къыщащтащ республикэпсо щэбэт щIыхьэху егъэкIуэкIыным теухуа унафэм и проектыр. Абы къыщалэжь ахъшэр хухахынущ школ ныбжьым ит сабийхэр гъэ еджэгъуэщIэм хуэгъэхьэзырыным. ЩIыхьэхур мэкъуауэгъуэм и 13-м зэхуашэсыну траухуащ. Ар республикэм и щIыналъэ псоми, къалэ округхэми щекIуэкIынущ. ЩIыхьэхум и фондым къыхуагъэхьыну ахъшэр трагуэшэнущ хуэмыщIауэ псэу унагъуэхэм къыщыхъу сабийхэм, дэтхэнэми сом минитI хуэзэу, ар адэ-анэхэм я счётхэм хуралъхьэнущ.
ЗэхъуэкIыныгъэхэр халъхьащ КъБР-м и къэрал мылъкур 2020 гъэм приватизацэ щIыным теухуа планым. Абыхэм япкъ иткIэ, республикэ бюджетым къыхэхъуэну къалъытащ сом мелуан 296-рэ.
«ЩIы Iыхьэ хэхахэр щатха гупым къыхэгъэкIауэ нэгъуэщI гупым хэгъэхьэным теухуауэ» унафэм и проектри къащтащ. Ар теухуащ Прохладнэ щIыналъэм и щIым хиубыдэ IыхьитI, гектаррэ ныкъуэрэ хъууэ, промышленнэ Iуэхухэмрэ нэгъуэщI щхьэусыгъуэ хэхахэм къыхуагъэсэбэп щIыхэм хагъэхьэным. Абыхэм я кадастр уасэр муниципальнэ щIыналъэм ику иту щызекIуэм нэхърэ нэхъ лъапIэкъым.
Апхуэдэу арэзы техъуащ КъБР-м и къэрал мылъкуу щыт, зи школ кIуэгъуэ мыхъуа сабийхэм щакIэлъыплъ яслъэ IуэхущIапIэхэу Шэджэм къалэм дэт езанэ еджапIэм къепхахэр Шэджэм щIыналъэм и мылъкум хэгъэхьэным теухуа унафэм и проектым. Абы псори зэхэту сом мелуан 31,7-рэ хуозэ.
КъБР-м и Правительствэм и резерв фондым щыщу сом мелуан 1,2-рэ Тэрч щIыналъэм и администрацэм хуаутIыпщыным теухуа унафэм и проектми арэ-зы техъуащ. Ахъшэр къыхуагъэсэбэпынущ Тэрчыпсым и Iуфэхэр гъэбыдэным. Псыдзэхэр къыщехым деж, Тэрч къоу, нэпкъым щхьэдэхыурэ Урожайнэ къуажэм зэран хуохъури, абы теухуауэ нэхъапэм ирагъэжьа лэжьыгъэхэр и кIэм нэгъэсыным трагъэкIуэдэну аращ ахъшэр.
2019 гъэм и етIуанэ илъэс ныкъуэм спортсменхэмрэ абыхэм я гъэсакIуэхэмрэ иратын хуея саугъэтхэр яIэрыгъэхьэжынми и унафэр ящIащ. Ахъшэр зратынухэр ягъэбелджылащ - ахэр олимп спорт лIэужьыгъуэхэмкIэ УФ-м и командэ къыхэхахэм хэтхэрщ, олимп спорт лIэужьыгъуэу щымыт, паралимп икIи сурдолимп спорт лIэужьыгъуэхэмкIэ къэралым и командэ нэхъыщхьэхэм хэтхэу Олимп, Паралимп, Сурдолимп Джэгухэм, дуней псом, Европэм, Урысей Федерацэм я чемпионатхэм бжьыпэр щызыубыдахэрщ, къыщыхэжаныкIахэрщ.
НэгъуэщI Iуэхухэми щыхэплъащ зэIущIэм. Апхуэдэу, КъБР-м промышленностымрэ сатумрэ зыщегъэужьыным хуэунэтIа къэрал программэм, КъБР-м и сакъылэт фондым хыхьэ объектхэм хыхьэхэр гъэбелджылыным зэхъуэкIыныгъэхэр халъхьащ. Къат куэду зэтет унэхэр сыт и лъэныкъуэкIи зыхуей хуэзэу зэгъэпэщыжыным хуэунэтIауэ къыхалъхьа программэр зэрылажьэм зэрыкIэлъыплъым, фэтэрхэм щIэсхэм мазэ къэс а Iуэхум халъхьэн хуей ахъшэхэр зэрат, абыхэм щIыхуэ ятелърэ ятемылърэ зэрызэхагъэкI щIыкIэм, нэгъуэщIхэми хэплъащ.
Зытепсэлъыхьа Iуэху псоми ятеухуа унафэ пыухыкIахэр къащтащ.