|
КIуэкIуэ Казбек иригъэкIуэкIащ Къэбэрдей-Балъкъэрым коронавирусым зыщиубгъуным пэщIэтынымкIэ Оперативнэ штабым и зи чэзу зэIущIэ
8 июня, 2020 - 07:00
Видеоконференц мардэм тету КIуэкIуэ Казбек иригъэкIуэкIащ Къэбэрдей-Балъкъэр Республикэм коронавирусым зыщыщыхъумэнымрэ а уз зэрыцIалэм зэрызиубгъум пэщIэтынымкIэ Оперативнэ штабым и зэIущIэ.
ЩIыналъэм щыщыIэ санитар-эпидемиологие щытыкIэмрэ медицинэ IуэхущIапIэхэм я лэжьыгъэр зэрекIуэкIымрэ хэплъащ.
КъБР-м и Iэтащхьэр едэIуащ къаIэта Iуэхугъуэхэм ятеухуауэ жэуап зыхь къулыкъущIэхэм жаIам. Узым къицIэлахэмрэ къапщыта цIыхухэмрэ ехьэлIауэ къэпсэлъащ Роспотребнадзорым Къэбэрдей-Балъкъэрым щиIэ къудамэм и унафэщI Пагуэ Жыраслъэн. Мэкъуауэгъуэм и 5-м ирихьэлIэу COVID-19-р къеуэлIауэ цIыху 3199-рэ ятхащ, абыхэм ящыщу 1502-р хъужащ, 29-р лIащ. Сымаджэщхэм щаIыгъщ пациент 950-рэ, абыхэм ящыщу 294-м я ныбжьыр илъэс 65-рэ ирокъу е нэхъыжьщ, реанимацэхэм цIыху 54-рэ щIэлъщ. Иужь махуи 10-м ику иту жэщ-махуэм къриубыдэу цIыху 60-м нэблагъэ сымаджэщхэм ягъэгъуэлъащ. Амбулаторнэу йоIэзэ сымаджэ 631-м, къазэреуэлIар къыхэмыщу 1496-рэ (процент 49-рэ) къахутащ. Къызэрежьэрэ тест 51111-рэ ирагъэкIуэкIащ икIи 7653-м КТ къэпщытэныгъэ ирагъэщIащ.
КIуэкIуэ Казбек къыхигъэщащ, эпидемиологие щытыкIэр зэпIэзэрыту, къыщиуду зызыубгъурэ куэд зэуэ щызэрыцIалэ щIыпIэхэр щымыIэми узыншагъэр хъумэнымкIэ IэнатIэхэм, санитар къулыкъухэмрэ лабораторэхэмрэ иджыпсту лэжьыгъэшхуэ къазэрыхукъуэкIар. ДызыхуэкIуэ лъэхъэнэм щыдикъалэн нэхъыщхьэр зэрызахъумэну щIыкIэр цIыхухэм- рэ IуэхущIапIэхэмрэ къагурыгъэIуэнырщ, къищынэмыщIауэ, уз зэрыцIалэм лэжьакIуэ, социальнэ гупхэр пэIэщIэ щIынырщ, IуэхущIапIэм щыщIыхьэкIэ цIыхухэр къэпщытэнырщ, сымэджахэм яIущIамэ, унафэщIхэм икIэщIыпIэкIэ хъыбар егъэщIэнымрэ къацIэлахэм адрейхэм зыпыIуадзынымкIэ зэфIэгъэкIыпхъэхэрщ.
КъБР-м узыншагъэр хъумэнымкIэ и министр Къалэбатэ Рустам жиIащ нобэкIэ COVID-19-м медицинэ IуэхущIапIитхум зэрыщеIэзэр. Абыхэм щагъэуващ гъуэлъыпIэ 1283-рэ, 594-р кислородым пыщIауэ, 152-р ИВЛ-кIэ къызэгъэпэщауэ. ГъуэлъыпIэ лейхэри, хуей хъумэ, щыIэщ.
Госпиталхэм я лэжьыгъэр къызэрагъэпэщ дохутыр 232-м, медицинэм и IэщIагъэлI курытхэмрэ нэхъыщIэу 611-м. Медицинэ лэжьакIуэхэр ягъэхьэзыр, ягъасэ зэпытщ, COVID-19 интерактив егъэджэныгъэ модулхэри (ИОМ) хэту. ИОМ-р зэзыгъэщIа IэщIагъэлIхэм я бжыгъэр 9859-м нэсащ.
Къалэ клиникэ сымаджэщ №2-мрэ Республикэ сабий клиникэ сымаджэщымрэ я лэжьыгъэм щыпащэ сымаджэщым щIэмылъу сабийхэмрэ балигъхэмрэ я пневмониер щагъэхъужыныр. Махуэ къэс ику иту йоIэзэ апхуэдэ цIыху 30-м нэблагъэм, процент 50-м щIигъум я ныбжьыр илъэс 65-м щIигъуауэ.
Къэрал контрактхэмрэ спонсор мылъкумрэ къыхэкIыу узыншагъэр хъумэнымкIэ IуэхущIапIэхэм зэпыу имыIэу яIэрохьэ зыхуеину щхьэзакъуэ зыхъумэжыныгъэмкIэ Iэмэпсымэхэр. КъищынэмыщIауэ, уз зэрыцIалэ нэхъ шынагъуэхэм щеIэзэ госпиталхэм ирагъэшащ ягъэIэпхъуэ рентген аппарату 3, пациентхэм зэракIэлъыплъ монитору 8, кислородыр псыкIэ зыгъэнщIу 150-рэ, жыжьэу къэзыпщ термометру 45-рэ, пульсоксиметру 100. Федеральнэ бюджетым къыхэкIыу ягъэуващ щIыпIэ 401-рэ кислородкIэ къызэзыгъэпэщ системэ.
Нобэм ирихьэлIэу тезыгъэгушхуэ ахъшэр къыхуабжащ икIи иратыжащ медицинэ лэжьакIуэ 5103-м, КъБР-м Узыншагъэр хъумэнымкIэ и министерствэм и унафэм щIэт IуэхущIапIэ 16-м я IэщIагъэлI 1915-рэ, медико-санитар IэнатIэм и пэщIэдзэ къудамэхэмрэ стационархэмрэ я лэжьакIуэ 3188-рэ къызэщIиубыдэу. Мы Iуэхум теухуауэ министерствэм зэпыу имыIэу къэпщытэныгъэхэр ирегъэкIуэкI икIи «телефон пщтырымрэ» къэрал Iуэхутхьэбзэхэм я порталымкIэ цIыхухэм зыкъызэрыхуагъазэм хоплъэ.
ЗэIущIэм щхьэхуэу щыхэплъащ Зыуэ щыт къэрал экзаменхэмрэ Урысей Федерацэм и Конституцэм халъхьэ зэхъуэкIыныгъэхэм папщIэ екIуэкIыну Урысейпсо IэIэтымрэ щекIуэкIкIэ санитар-эпидемиологие шынагъуэншагъэр къызэрызэрагъэпэщыну щIыкIэм.
КъБР-м ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и министрым и къалэнхэр зыгъэзащIэ Езауэ Анзор щигъэгъуэзащ, 2020 гъэм ЕГЭ-р ятын папщIэ щIыпIэ 27-рэ зыхуей зэрыхуагъэзар: 26-р - егъэджэныгъэ IуэхущIапIэхэм, 1-р - унэм. Аудиториехэм я бжыгъэр 358-рэ мэхъу. Роспотребнадзорым и чэнджэщхэм тету а щIыпIэ псори шынагъуэншагъэ IэмалхэмкIэ къызэгъэпэщащ: пэшхэр дезинфекцэ ящIащ, IэщIагъэлIхэмрэ хэтынухэмрэ щыщIыхьэкIэ къапщытэнущ, пэшхэм антисептик Iэмалхэр щыIэнущ, ЕГЭ-м хэтхэр, предмет комиссэхэм я экспертхэр метрэ 1,5-кIэ мынэхъ мащIэу зэпэщIэхауэ ягъэтIысынущ, медицинэ бригадэхэм дежурствэр ирахьэкIынущ.
КъБР-м и ХэхакIуэ комиссэм и унафэщI Джэш Вячеслав зэрыжиIамкIэ, урысейпсо IэIэтыр гъэхьэзырынымрэ егъэкIуэкIынымрэ къызэрагъэпэщынущ щIыналъэ 13-мрэ участкэ 355-мрэ я хэхакIуэ комиссэхэм. ХэхакIуэхэм я бжыгъэу ятхар 537720-рэ мэхъу.
IэIэтым хэтыну псоми я шынагъуэншагъэр къызэрагъэпэщын папщIэ Iэмал щыIэщ мэкъуауэгъуэм и 25-м щыщIэдзауэ бадзэуэгъуэм и 1 пщIондэ я унэм къыщIэмыкIыу, къищынэмыщIауэ здэщыIэ щIыпIэм нэхъ пасэу а Iуэхур щрагъэкIуэкIыну. Мэкъуауэгъуэм и 5-м щегъэжьауэ лъэIу тхылъхэр Iахынущ. Iэ щаIэтыну щIыпIэхэм Iэмал щратынущ цIыхухэм яхуэмызэу ар зэфIагъэкIыну, щыхьэпIэ-щIэкIыпIэ щхьэхуэхэр щыIэнущ, температурэр къапщынущ, медицинэ нэкIуIупхъуэхэр, Iэлъэхэр, дезинфекцэ зэращI Iэмалхэр иратынущ.
КъБР-м и Iэтащхьэмрэ Правительствэмрэ я пресс-IуэхущIапIэ.
|
28.03.2024 - 09:03 ЩIыгум и ныбжьым ебгъапщэмэ, псэ зыIут дунейм еплъытмэ, цIыхум къикIуа гъуэгуанэр кIэщI дыдэщ, тхыдэм и щапхъэхэмкIэ ар мащIэщ. |
|
28.03.2024 - 09:03 Кавказ Ищхъэрэм и щIыналъэхэм алыдж-урым бэнэкIэмкIэ я спортсмен нэхъ лъэщхэр, илъэс 24-рэ зи ныбжьхэр, иджыблагъэ щызэхуэсащ Дагъыстэным и Каспийск къалэм. |
|
27.03.2024 - 13:58 Тхыдэдж-щIэныгъэлI Сокъур Валерэ «Кърым зауэр къэзыхьа ХьэтIохъущокъуэ и къуэ Кургъуокъуэ - пщыхэм я Iумахуэт» зыфIища и тхыгъэм къызэрыхэщу, зи ныбжьыр илъэс 27-рэ фIэкIа мыхъуа Къаплъэн-Джэрий, I |
|
27.03.2024 - 12:25 Мэзкуу областым и Рузэ къалэм иджыблагъэ щекIуэкIащ Олимп джэгухэм хыхьэ тхэквондо лIэужьыгъуэмкIэ (ВТФ) Урысейм пашэныгъэр къыщыхьыным хуэунэтIауэ ныбжьыщIэхэм, хъыджэбзхэмрэ щIалэхэмрэ я зэхьэзэх |
|
27.03.2024 - 09:03 (ГъащIэ теплъэгъуэ) |
|