Къабарты-Малкъарны Башчысы Казбек Коков КъМР-ни урунуу эм социал къоруулау министри Асанланы Алим бла видеотюбешиу бардыргъанды. Республиканы оноучусу аны КъМР-де коронавирус жайылгъан болумлада ишлери болмагъанлагъа эм къолайсызлагъа, сабийли юйюрлеге социал болушлукъ амалланы юсюнден докладына тынгылагъанды.
Ведомствону таматасы сабийлери болгъан юйюрлеге социал болушлукъну быллай къошакъ амаллары тапдырылгъанларын айтханды:
- файдалары юйюрде хар инсаннга жашау этерге жетген ахчаны ёлчеминден озмагъан къауумланы 3 жылдан 7 жылгъа дери сабийлерине жашау этерге жетген ахчаны (КъМР-де ол 6853,5 сомду) 50 процентин ай сайын тёлерге. Тёлеуле 2020 жылны 1 январындан кезиуге берилликдиле. Къырал эм муниципал жумушла тапдыргъан бирлешген къырал порталда электрон заявленияланы алыу башланнганды;
- 3 жылларына дери сабийлеге 2020 жылны апрель-июнь айларында ай сайын 5 000 сом тёлеу. Заявленияны КъМР-де Пенсия фондха берирге тийишлиди неда, къырал жумушла тапдыргъан регион порталны хайырланып, электрон халда жарашдырыргъа;
- 3 жылдан 16 жыллары толгъан сабийлеге бир жолгъа тёленнген 10 минг сом. Заявленияны КъМР-де Пенсия фондха неда къырал жумушла тапдыргъан портал бла электрон халда берирге боллукъду.
Андан сора да, сабийлеге, сакъат сабийлеге алгъадан белгиленнген ай сайын эм бир жолгъа берилген федерал эм регион пособияланы бла тёлеулени, жашау журтха, коммунал жумушлагъа берилген субсидияланы заман болжаллары 2020 жылны 1 октябрине дери созуладыла. Ишлери болмагъан, неда ишлерин 2020 жылны 1 мартындан сора тас этгенле, «Россейде иш» порталда энчи кабинетде регистрацияны ётюп неда Къырал эм муниципал жумушла тапдыргъан бирикген порталда электрон заявление берип, Иш бла жалчытыу арада эсепге тюшерге боллукъдула.
Иш бла жалчытыу службагъа 2020 жылны 1 мартындан башлап эсепге тюшерча 21487 заявление берилгенди. Бюгюнлюкде эсепге алыннган ишсизлени саны 22 мингден асламды. Алты ай заман ёлчемге алагъа 1500 сомдан 12130 сомгъа дери пособия тохташдырылады, ишсиз къалгъан кюнлерине, алгъыннгы ишчи жерлеринде къаллай бир уруннганларына эм ахыр ишлеген жерлеринде орталыкъ айлыкъгъа кёре. 2020 жылны 1 мартындан акъылбалыкъ жыл саннга жетмеген сабийлилери болуп ишлеринден кетерилгенлеге ишсизлик ючюн тёлеулерине 2020 жылны апрель-июнунда 18 жыллары толмагъан хар сабий ючюн 3000 минг сом къошулады.
Андан сора да, башха-башха сылтаула бла 1500 сом ёлчемли эм аз федерал тёлеу буюрулгъан ишсизлеге КъМР-ни Башчысыны оноуу бла коронавирус бла байламлы 2020 жылны май-июнь айларына регион бюджетден 5 минг сом къошакъ ахча берилликди. Бюгюнлюкде республиканы 13 мингден артыкъ инсаны ол тёлеулени алгъандыла.
Ишсизлеге дагъыда бирси болушлукъ амалла да сакъланадыла. Ёксюз сабийлеге, 23 жыл саннга дери эсепде тургъан ишсизлеге КъМР-де орталыкъ айлыкъны ёлчеми чакълы бир пособие 6 айны тёленип турлукъду, артда - алгъын белгиленнген эм аз ёлчемде. Пенсиягъа чыгъаргъа деп тургъанлагъа ишсизлик ючюн тёлеулени заман болжалы 12 айды. Сабий тууса, ишлемеген ата-анагъа бир жолгъа 18 минг сом бериледи.