КъМР-ни Правительствосу коронавирусну кезиуюнде къоранчла сынагъан предприятияланы тизмесин кенгертгенди. Анга медицина бла байламлы иш, машиналаны жуугъан жерле, спорт товарланы арендагъа, лизингге берген, къумач сокъгъан, розницагъа кийимле тикген, тери ийлеген эм андан продукция этген, резина, пластмасс затла чыгъаргъан,   мебель хазырлагъан, машиналагъа ремонт бардыргъан оборудование жарашдыргъан эм ала кибик башха затланы чыгъаргъан предприятияла кийирилгендиле.
 КъМР-ни Правительствосу къытлыкъны бютюнда сынагъан бёлюмлени тизмесин 29 апрельде чыгъаргъан 211-рп номерли бегими бла къабыл кёргенди. Биринчиден, анда жюклени машина эм самолёт бла ташыу,  физкультура-саулукъ сакълау жумушла тамамлау, спорт, туризм, къонакъ юйле, къошакъ билим бериу, аш-азыкъ болмагъан затланы розницагъа сатыу-алыу бёлюмле болгъандыла.
Аладан сора да, тизмеде конференцияла, кёрмючле къурау, адамланы излемлерин жалчытыу, культура, адамланы солуу заманларын къурау иш, музейле, зоопаркла да бардыла.