КъБР-м и Iэтащхьэ КIуэкIуэ Казбек видеоконференц мардэм тету дыгъуасэ иригъэкIуэкIащ коронавирус уз зэрыцIалэм республикэм зыщемыгъэу-бгъуным хуэунэтIа профилактикэ лэжьыгъэхэр къызэрызэрагъэпэщымрэ а узыфэм зэрыпэщIэтымрэ теухуа Iуэхухэр зэкIэлъызыгъакIуэ Оперативнэ штабым и зэIущIэр.
Абы щыхэплъащ республикэм коронавирусым и зэранкIэ щыщыIэ хъуа санитар-эпидемиологие щытыкIэм, узыншагъэр хъумэным епха IуэхущIапIэхэм я лэжьэкIэм, карантин мардэхэм цIыхухэр зэрытетым.
КъБР-м и Iэтащхьэм зэIущIэм хэтхэм ягу къигъэкIыжащ цIыхухэм узыфэм зыщахъумэным хуэунэтIауэ зытехьа мардэхэм хуэм-хуэмурэ къытекIыжыным яужь ихьэн папщIэ «Роспотребнадзор»-м унэтIыныгъищым къагъэлъагъуэхэр къэлъытэн хуейуэ накъыгъэм и 8-м къызэригъэувар. А псори пыщIащ щIыналъэм щыIэ эпидемиологие щытыкIэмрэ узыншагъэр хъумэн IэнатIэр абы зэрыхуэхьэзырымрэ.
«Фэ зэрыфщIэщи, дэ мурад тщIауэ щытащ накъыгъэ махуэшхуэхэм яужькIэ иджыри зы тхьэмахуэкIэ зытIэжьэну, нэгъуэщIу жыпIэмэ, республикэм щыIэ эпидемиологие щытыкIэм иджыри накъыгъэм и 15 пщIондэ дыкIэлъыплъыну. Иджы, оперативнэ штабым и лэжьыгъэм кърикIуахэр и лъабжьэу, щыIэ щытыкIэри къэлъытауэ, унафэ пыухыкIа, псори щызэпэлъыта къэтщтэн, мардэ пыухыкIам къикIыным хуэм-хуэмурэ хуэкIуэн хуейщ, абы щыгъуэми узыфэм аргуэру зиубгъуу хуежьэмэ, абы дызэрыпэщIэувэну щIыкIэри убзыхуауэ, Iуэхум дыхуэхьэзыру щытыпхъэщ», - къыхигъэщащ КIуэкIуэ К. В.
КIуэкIуэ Казбек едэIуащ коронавирусым ехьэлIауэ республикэм щыIэ щытыкIэр зыхуэдэм теухуауэ КъБР-м щыIэ «Роспотребнадзор»-м и унафэщI Пагуэ Жыраслъэн жиIахэм. Пагуэ Ж. А. къыхигъэщащ зи унафэщI IуэхущIапIэм иригъэкIуэкIа къэпщытэныгъэхэм къагъэлъэгъуахэм, COVID-19 узыфэм зэрызиубгъу щIыкIэм теухуа Iуэху нэхъыщхьэхэм Урысейм и «Роспотребнадзор»-мрэ УФ-м Узыншагъэр хъумэнымкIэ и министерствэмрэ зэрыхагъэплъар, абы щыгъуазэ зэращIар. Ар, къэбгъэлъагъуэмэ, тестхэр зэрырагъэтамрэ КТ къэпщытэныгъэхэмрэщ, узыфэр зэуэлIахэм я бжыгъэм къызэрыхэхъуэ щIыкIэрщ, узыр нэхъ хьэлъэу зэуалIэхэм папщIэ сымаджэщхэм гъуэлъыпIэ лейхэр къызэрыщызэрагъэпэщарщ, апхуэдэуи, сымаджэщхэм щIэмыгъуалъхьэ щIыкIэ пневмоние узыфэр зэуэлIауэ къахутахэмрэ коронавирусым илIыкIахэмрэ я бжыгъэрщ. КъаIэрыхьэжа методикэ чэнджэщхэм къызэрагъэлъэгъуащи, Къэбэрдей-Балъкъэрыр хуэхьэзырщ карантиныр къэгъэщэбэным хуэунэтIа япэ Iыхьэм хуэкIуэным.
КъБР-м узыншагъэр хъумэнымкIэ и министр Къалэбатэ Рустам и гугъу ищIащ диагностикэ лэжьыгъэхэр егъэкIуэкIыным, сымаджэхэм еIэзэным, ахэр хущхъуэкIэ къызэгъэпэщыным, хуей хъужыкъуэмэ къагъэсэбэпын хуэдэу сымаджэщхэм гъуэлъыпIэ лейхэр зэрыщагъэувым, медицинэ IэмэпсымэхэмкIэ ирикъуу къызэрызэгъэпэщам. Накъыгъэм и 11-м къыщыщIэдзауэ сымаджэхэр щIагъэгъуалъхьэу хуежьащ ещанэ госпиталым - Прохладнэ къалэ округымрэ Прохладнэ щIыналъэмрэ я сымаджэщ нэхъыщхьэр и лъабжьэу къызэрагъэпэщам. Мы зэманым яIэщ щыIэ мардэхэм тету кислородрэ ИВЛ IэмэпсымэхэмкIэ къызэгъэпэща гъуэлъыпIэ 521-рэ, къимыдэкIэ, иджыри гъуэлъыпIэ 320-рэ ягъэувыну хьэзырхэщ.
Накъыгъэм и 15-м ирихьэлIэу Къэбэрдей-Балъкъэрым COVID-19 узыфэр цIыху 1619-м япкърыту щатхащ, абыхэм ящыщу 319-р хъужащ, цIыхуибл узым къелакъым. Тест 25233-рэ ирагъэкIуэкIащ. Я унэхэм медицинэ лэжьакIуэхэр щакIэлъоплъ цIыху 1998-м. Сымаджэщхэм щIэлъщ цIыху 357-рэ, амбулаторэ кIэлъыплъыныгъэм щIэтщ 320-рэ. Узыфэм и щытыкIэхэр мынаIуащэу ар цIыху 616-м япкърокI.