Къабарты-Малкъар къырал университет «Роснано» компаниягъа бойсуннган «ТехноСпарк» биригиуню билим бериу программасына къатышырыкъды. Аны бла байламлы энди университетни айырмалы студентлери анда практикаларын ётерикдиле.
Быйыл февральда «ТехноСпарк» бла Къабарты-Малкъар къырал университет «стартап-диплом» программаны бардырыргъа келишгендиле. Аны чеклеринде хар стажёргъа хазыр стартап берилликди. Анга кёре студент тогъуз айны ичинде аны бардырыргъа технология продукт къураргъа, ишчиле алыргъа эм рынокга да чыгъаргъа, керек боллукъду. Алай бла эм игиле технология предпринимательстволукъ бла шагъырейленнгенден сора да, дипломла аллыкъдыла.
- Саулай айтханда, бизге бир тюрлю бизнесни башлап, аны айныта билликле эм бирсилеге да урунургъа болушурукъла керекдиле, - дейди «ТехноСпарк» компанияны таматасы Денис Ковалевич.
Технопаркда жаш специалистле кеслерин «электроника», «прикладная геномика», «индустриальная микробиология» эм башха бёлюмледе да сынарыкъдыла.
- Проект бюгюнлюкде болмагъанча магъаналыды. «ТехноСпарк» университетле эм компанияла бла да байламлыкъ жюрютген, ахшы онглары болгъан организацияды. Практиканы ётген студентлерибизден аламат технология предпринимательле чыгъарла деп бек ышанама, - дейди КъМКъУ-ну ректору Юрий Альтудов.
Бюгюнлюкде проектге къатышыргъа сюйгенлерин эки жыйырма студент билдиргенди. Регистрация юч айны бардырыллыкъды. Ызы бла кюз артында чыгъарылгъан эсеплеге кёре, Троицк шахаргъа «ТехноСпаркга» стажировкагъа барырча эм игиле сайланырыкъдыла.