Видеоконференция халда КъМР-ни Башчысы Казбек Коков республиканы бизнес-сообществосу бла жангы коронавирус инфекцияны жайылыу болумунда бир къауум макъаналы сорууланы бла жарсыуланы сюзгенди, излемлеге бла сурамлагъа тынгылагъанды.
Кенгешни ишине КъМР-ни Правительствосуну Председатели Мусукланы А.Т., КъМР-де Предпринимательлени эркинликлерини сакълау жаны бла уполномоченный Ю.С. Афасижев, республиканы Правительствону бла Парламентни экономика бёлюм жаны бла келечилери, Опора России эм Деловая Россия жамауат организацияланы регион бёлюмлерини таматалары къошулгъандыла.
«Болум эс бурурчады. Битеу дуния экономикагъа, бютюнда гитче бизнесге, къыйынды», - деп белгилегенди КъМР-ни Башчысы, предпринимательлеге айланып.
Аны бла бирге, деп къошханды К.В. Коков, ол битеу дунияда, бизни къыралда да къалай ёсе баргъанын кёребиз. Адамланы жашауларына бла саулукъларына къоркъуу чыкъгъанды. Биз ол затлагъа бек къайгъырабыз. Жолугъууланы, адамланы асламлы жыйылыуларын азайтыу магъаналыды. Аны ючюн чеклеу мадарланы хайырланыргъа керек болгъанды. Ол а бирси къыраллада болгъан болумладан – ауур ауругъанланы санларыны терк ёсюуден – къутулургъа онг бергенди.
Экономикагъа хатасы сезимли болмаз ючюн, гитче эм орта бизнесге деп кризисге къажау амалла жарашдырыладыла, аланы баш борчлары ишчи жерлени сакълауду, компаниялагъа болушлукъ этиудю.
Къабарты-Малкъарда 2 апрельде профильли оператив штаб къуралгъанды, экономика айныуну эм социал тохташыулукъну жалчытырча болжалгъа салынмай тындырыллыкъ план жарашдырылып къабыл этилгенди, анга кёре республикалы налогла, ортакъгъа тёлеуле болжалгъа салыннгандыла, аланы ставкалары азайтылгъандыла, бегирек апчыгъан бёлюмлеге болушлукъ этилинеди.
Кризисге къажау мадарла 10 минг налог тёлеучюлени жашауларын женгиллендирликдиле. Сёзге, 2020 жылда налог салыу патент системаны хайырланнганда база файдалыкъны 16,6 сомгъа тюшюую бла байламлы КъМР-ни законуну проектин Правительство къабыл кёрюп, Парламентни къараууна бергенди. Оноу кючюне киргинчи, патентни эм аз багъасы 9600 сомдан 60 минг сомгъа дери эсе, ол амал къабыл этилгенден сора тёленнген налогну ёлчеми бир сом боллукъду.
Налог салыуну упрощённый низамына кёре аванс тёлеуле эм 2020 жылны 1 мартына реестрге тюшген гитче эм орта бизнес организацияланы ырысхыларына налогла сентябрьни ахырына кёчюрюледиле. Эм апчыгъан бёлюмлени тизмесинде болгъан предприятиялагъа налог салыу ставкаланы азайтыу жаны бла оноугъа къарала турады. Энди налог салыугъа объектге «доходы» дегенни сайлагъанлагъа упрощённый системада ставка 6 процентден 1 процентге дери тюшеди. «Доходы минус расходы» деп белгиленнгенледе – 9 процентден 15 процентге дери болургъа болгъан ставка 5 процент чакълыгъа азаяды. Организацияланы ырысхыларына налог обнулениягъа келеди.
Андан сора да, КъМР-ни къырал иелигинде тепдирилмеген ырысхыны ортакъгъа алыу келишимлерине кёре МСП субъектлеге аренда тёлеуле болжалгъа салыннгандыла. Бизнес-инкубаторланы майданларында ортакъгъа алыу тёлеуле азайтылгъандыла. Республиканы предпринимательствогъа билеклик этиу институтлары эм банклары кризисге къажау энчи пакетле къурагъандыла.
- Бу оноуланы барысы да ишлеп башлагъандыла. Ала мурдор мадарладыла, аны бла тохтап къаллыкъ тюйюлбюз. Сагъыш этерикбиз, тюзетирикбиз, башхаларын къошарыкъбыз, - деп чертгенди КъМР-ни Башчысы.
