ГИБДД-ны Май районда бёлюмюню келечилери муниципалитетде эл мюлк предприятияланы уруннганлары бла бирге «Биз сизни ючюн ишлейбиз, сиз а бизни ючюн юйде туругъуз» деген битеудуния флешмобха къатышхандыла, деп билдиргендиле ведомстводан.
Бу профилактика жумушну чеклеринде районда автоинспекторла сагъынылгъан предприятияланы ишчилерине жолда жюрюуню жорукъларын къайтарып эсгертгендиле, аны бла бирге уа коронавирус жайылгъанына чек салыу амалланы юсюнден да хапарлагъандыла.
Шёндю жер-жерледе сабан ишлени къыстау бара тургъан кезиуюдю. Аны себепли эл мюлк предприятиялагъа ишни тыяргъа жарарыкъ тюйюлдю. Алай дагъыда, аны тийишли жорукъладан таймай, уруннган адамланы саулукъларына да сагъыракъ болуп тамамларгъа онг барды.
Право низамны сакълаучула быллай техниканы ичинде дезинфекция этерге, къолланы, ала жетген аберилени да кезиу-кезиу тазалап турургъа чакъыргъандыла. Элчиле айтылгъанны сансыз этмегендиле, алагъа къайгъыргъанлары ючюн ыразылыкъларын да билдиргендиле.