Тюнене КъМР-ни Башчысы Казбек Коков Къабарты-Малкъар Республикада коронавирус жукъгъан ауруудан сакъланыуну мадарларын этиу эмда аны жайылмазына сакъ болуу жаны бла оператив штабны жыйылыуун видеоконференция халда бардыргъанды. Аны кезиуюнде шёндюгю болум сюзюлгенди эмда регионда COVID-19 жугъуп ауругъанланы саны андан ары ёсмез ючюн не мадарла этилгенине, бизнесге бла халкъны къолайсыз къауумуна къаллай болушлукъ берилгенине къаралгъанды.
Республиканы оноучусу жууаплы къуллукъчуланы билдириулерине тынгылагъанды. Роспотребнадзорну КъМР-де Управлениясыны башчысы Жираслан Пагов 17 апрельге ауругъанланы саны 92-ге жетгенин, 8 адам сау болгъанын билдиргенди, реанимацияда да алтаулан бардыла. Докладчы айтханнга кёре, 7031 адамны саулукълары тинтилгенди, ууланнганла бла байламлы болгъанла, ала уа 1041-ге жетгендиле, юйлеринде турадыла, алагъа медикле къарайдыла.
Казбек Коков Роспотребнадзорну жер-жерли бёлюмюню таматаларындан COVID-19 ауруугъа жагъылгъанларын бла къалгъанларын эртте ачыкълар эмда заманында багъар ючюн, тестле этиуню кёбейтиуню онгларына къарарларын тилегенди.
КъМР-ни саулукъ сакълау министри Рустам Калибатов саусузлагъа багъыу къалай къуралгъанын, ала дарманла, башха медицина керекле бла да къалай жалчытылгъанларын билдиргенди. Ведомствогъа къошакъ ундурукъла хазырлау жаны бла ишни андан ары бардырыргъа буюрулгъанды. Урунуу эмда социал къоруулау министр Асанланы Алим да республиканы халкъыны къолайсыз къауумуна къаллай тутхучлулукъ этилгенин, ишчи жерлени сакълау жаны бла мадарланы юслеринден да хапарлагъанды.
КъМР-ни жарыкъландырыу, илму эмда жаш тёлюню ишлери жаны бла министрни къуллугъун болжаллы халда толтургъан Анзор Езаов айтханнга кёре уа, республиканы битеулю билим берген учреждленияларыны 1-8-чи классларыны окъуучуларына окъуу жыл 30 апрельде бошаллыкъды. Аланы билимлерин билир муратда бардырылгъан битеуроссей иш кюз артына кёчюрюлгенди. Республиканы башчысы школчуланы жай каникулларын тап къурау жаны бла къошакъ мадарла этерге кереклисин эсгертгенди.
Кенгешде дагъыда, Рособрнадзорну бла РФ-ни Жарыкъландырыу министерствосуну жангы расписанияларыны проектине кёре, ОГЭ-ни бла ЕГЭ-ни бериуню баш кезиую 2020 жылда 8 июньдан 31 июльгъа дери бардырыллыгъы билдирилгенди. Орус тилден бла математикадан экзаменлени баш эмда резерв кюнлерин регионла кеслери тохташдырлыкъдыла. Быйыл сайлагъан предметлерине кёре экзаменлени тогъузунчу классны бошагъанла берлик тюйюлдюле.