РФ-ни Президенти Владимир Путин Правительствону келечилери бла видеоконференция амал бла кенгеш бардыргъанды. Анда коронавирус жукъгъан ауруугъа къажау ишни чеклеринде экономикагъа, бизнесге болушлукъну, инсанланы иш бла жалчытыуну, къолайлыкъларын сакълауну сорууларына къаралгъанды.
Къыралны оноучусу бу жаны бла къошакъ мадарла керек болгъанларын чертгенди. Ол санда Владимир Владимирович гитче эм орталыкъ бизнесни предприятияларына баш магъаналы жумушланы тамамлаугъа, ол санда ишчилеге айлыкъны тёлеуге, къыралны жанындан финанс болушлукъ этилирге кереклисин чертгенди.
Аны ёлчеми компанияда ишчилени санына кёре тёленирикди – хар адамгъа орта эсеп бла 12,1 минг сом. Алай бу болушлукъну алыр ючюн предприятие ишчилерини санын азайтмай, аланы 90 процентин сакъларгъа керекди.
Экономикагъа магъаналы предприятиялагъа да этилликди себеплик. Алагъа баш магъаналы товарла, оборудование сатып алыргъа, аланы келтиргенлеге тёлеулеге льгота кредитле берилликдиле. Ол а компанияланы кеслерине, ала сатыу-алыу этген фирмалагъа бу кезиуню къоранчсыз ётдюрюге онг берликди.
Андан сора да, РФ-ни Президенти регионлагъа бюджетлерини файдаларын бла къоранчларын бирге келишдирирге 200 миллиард сом бёлюрге буюргъанды. Субъектлеге бу ахчаны экономикагъа болушлукъгъа, инсанланы иш бла жалчытыу жаны бла мадарлагъа, пособияланы, бюджетде уруннганлагъа хакъларын тёлеуге, баш магъаналы социал жумушлагъа къоратыргъа эркин этиледи
РФ-ни Правительствосу авиацияда ишлеген компаниялагъа болушлукъгъа 23 миллиард сом бёллюгю да белгили этилгенди. Ахча техниканы лизинг амал бла сатып алыугъа, айлыкъны тёлеуге, сомолётла тургъан жерле ючюн тёлеулеге къоратыллыкъды.