Адыгэхэм ди махуэшхуэм ­ирихьэлIэу, Налшык къалэм, Прави­тельствэм и Унэм и гупэм къит ЗэгурыIуэныгъэм и утыкум фокIадэм и 20-м щызэ­хаублащ ­республикэм ис лъэпкъ­хэм я щэн­хабзэ фести­валь. Абы хыхьэу къызэрагъэ­пэщащ концертрэ лъэпкъ шхы­ныгъуэхэм я гъэлъэгъуэныгъэ­рэ. ГуфIэгъуэ зэхыхьэр къыд­дагъэлъэпIащ республикэм ис ­балъкъэрхэм, урысхэм, къэ­закъ­хэм, куржыхэм, абхъазхэм, тырку­хэм, эстонхэм, журт­хэм, азер­бай­джанхэм, ермэлы­хэм, нэ­гъуейхэм, украинхэм, белорусхэм я лъэпкъ щэнхабзэ центр­хэм.

КъБР-м и Iэтащхьэ КIуэкIуэ Юрий, Дунейпсо Адыгэ Хасэм и тхьэмадэ Сэхъурокъуэ Хьэутий, Къэбэрдей-Балъкъэрым граждан жылагъуэхэм ядэлэжьэным­рэ лъэпкъ IуэхухэмкIэ и министр и унафэщI КIурашын Андзор, Дунейпсо Адыгэ Хасэм и XII Конгрессым хэтыну гъунэгъу щIыналъэхэмрэ ­хамэ къэралхэмрэ къикIыу къеблэгъа хьэщIэхэр, республикэм и министерствэхэмрэ ве­домствэхэмрэ я лэжьакIуэхэр щIыгъуу, лъэпкъхэм къадекIуэкI щэнхабзэ хъугъуэ­фIыгъуэхэм, цIыхубэ IэпщIэлъапщIэхэм я ­Iэдакъэ къыщIэкIа хьэп­шыпхэм, лъэпкъ фащэхэм зыхагъэгъуэзащ, я шхыныгъуэхэм я IэфIагъым чэзууэ еплъащ.
Европэм, КъуэкIыпIэ Гъунэгъум къикIа хьэщIэхэм фIэхъус щарихым, КIуэкIуэ Юрий и псалъэм къыхигъэщащ адыгэхэм ди зэ­хэщIы­кIыр, нэгъуэщI лъэпкъхэм дакъыхэзыгъэщхьэхукI щыIэ­кIэр, дуней тетыкIэр, щэнхабзэр, бзэр, цIыхугъэр тхъумэжыным и IуэхукIэ ди къарур зэдгъэуIун, ди щIэблэм нэхъыжьхэм, лъэпкъ ­хабзэхэм пщIэ хуащIу къэдгъэ­хъун, абыхэм я мы­хьэнэр зыхащIэу къэгъэтэджын зэрыхуейр.
Республикэм щылажьэ щэнхабзэ Iуэхухэм сыт щыгъуи жыджэру ­зыкъыщызыгъэлъагъуэ щэнхабзэ центрхэр иджыри апхуэдэт. Къэбэр­дей-Балъкъэрым лъэпкъи 100-м щIигъу щопсэу икIи абыхэм          я зэкъуэтыныгъэр зэныбжьэгъу­гъэм и щапхъэ дахэщ. Щэнхабзэ зэхыхьэ гуапэм республикэм ис лъэпкъхэм ди зэхуаку дэлъ зэ­ныбжьэгъугъэмрэ зэкъуэтыныгъэмрэ нэхъри игъэбыдащ. Апхуэдэ Iуэху­хэр уасэншэщ, гъу­нэгъухэм пщIэрэ нэмысрэ хуэ­щIы­нымкIэ, я зэхуаку шыIэныгъэрэ лъытэныгъэрэ дэлъ­хьэ­ным­кIэ, лъэпкъ щэнхабзэмрэ ­къадекIуэкI хабзэ дахэхэмрэ ад­рейхэр хэгъэгъуэзэнымкIэ.
ЗэгурыIуэныгъэм и утыкум ще­кIуэкIа концертыр ягъэдэхащ ­республикэм и уэрэджыIакIуэ, къэ­фа­кIуэ гупхэм. Абы ирихьэ­лIэу Аб­хъазым и утыкум концерт гукъинэж щатащ щIыналъэр зэ­рыгушхуэ артист Iэзэхэм.
Республикэм щекIуэкIа гуфIэгъуэ зэхыхьэхэм хэтащ цIыху мин 50-м щIигъу. Бысымхэмрэ хьэ­щIэхэмрэ зэгурыIуащ дяпэкIэ зэкIэлъыкIуэну, я щэнхабзэ зэ­пыщIэныгъэр ягъэ­быдэну.

бжьыхьэлI  Розэ.

Сурэтхэр  Къарей Элинэ  трихащ.