ЩІэныгъэм и къигъэхъуапІэ

Къэбэрдей-Балъкъэр къэрал университетым егъэджэныгъэр пыІудзауэ къызэзыгъэпэщ системэм зрегъэубгъу
КІуэ пэтми зызыубгъу электрон Іэмалхэм я фІыгъэкІэ Іуэхугъуэ куэдыр еджапІэхэм ялъэІэс икІи щызэрахьэ хъуащ. Абы и лъэныкъуэкІэ ­къапщтэмэ, щапхъэ дахэщ Бэрбэч ХьэтІутІэ и цІэр зезыхьэ Къэбэрдей-Балъкъэр къэрал университетым медицинэм щыхурагъаджэ и къудамэр егъэджэныгъэр пыІудзауэ къызэзыгъэпэщ системэм (система дистанционного обучения) хэувэу, абы тету лажьэ «Anatomage» зи фІэщыгъэ щІэныгъэ-егъэджэныгъэ Іэмалым зызэрыпищІар. ЦІыхум и Іэпкълъэпкъыр 3D-жыпхъэм иту уэзыгъэлъагъу атласщ ар. Іэпкълъэпкъым и зэпэщ щытыкІэри, сэкъат игъуэта нэужь зэрыувэ щІыкІэри къэзыгъэлъагъуэ а программэм дэтхэнэ зы пкъыгъуэми и лэжьэкІэр, и ухуэкІэр, и зэхэлъыкІэр ІупщІ пщищІу гъэпсащ.
«ЩІэныгъэ нэхъыщхьэ щызрагъэгъуэт еджапІэхэр пыІудзауэ еджэным зэрыхуэкІуэрэ, иджырей технологиехэм тещІыхьа бгъэдыхьэкІэхэри къэдмыгъэІэгъуэу хъуркъым. Медицинэм хуеджэ студентхэр open.kbsu интернет Іэмалым техьащ, абдеж щІэнІуатэхэри щокІуэкІ, тест лэжьыгъэхэри щащІ, щІэныгъэщІэхэри щызрагъэгъуэт. «Anatomage»-м зетпхыным къытхуихьа фІыхэм ящыщщ, псалъэм папщІэ, анатомиемкІэ едгъэкІуэкІ щІэнІуатэхэр нэрылъагъу щапхъэхэмкІэ щыз зэрытхуэщІыр, къэхутэныгъэм дихьэх еджакІуэхэм щІэныгъэ хэхыпІэхэр къахузэдгъэпэщыну Іэмал диІэ зэрыхъур», - жеІэ медицинэ къудамэм и декан Мизиев Исмэхьил.
Студентхэр зыщІэупщІэ Іуэхугъуэхэм егъэджакІуэм жэуап щаритыжкІэ, абы Іэмал хъарзынэ иІэщ цІыху Іэпкълъэпкъыр Іыхьэ-Іыхьэу зэрызэхэлъыр 3D-жыпхъэм иту яригъэлъагъум къыщымынэу, зыгъэпІейтей пкъыгъуэр зэрызэхэтыр ин щІауэ асыхьэтым я пащхьэ ирилъхьэну, абы уфІэкІыжмэ, ар зэщхьэщыхауэ, и бгъуагъкІи, и кІыхьагъкІи зэгуэхауэ яригъэлъагъуну. Езы пкъыгъуэм и лэжьэкІэр наІуэ зэрищІым хуэдэуи, нэгъуэщІ Іыхьэхэм зэрепхари, абыхэм зэрадэлажьэри ІупщІ ещІ.
«ЦІыху Іэпкълъэпкъым и 3D-жыпхъэр щызэхалъхьэм, - къыдгурегъаІуэ анатомиемрэ хирургиемкІэ кафедрэм и лэжьакІуэ нэхъыжь Ахъмэт Аслъэнбэч, - абы хагъэува сурэтхэр псэууэ дунейм тета цІыхухэм я Іэпкълъэпкъхэм трахаращ. ІэкІи ятхакъым, иджы щыІэ сурэтыщІ ІэмалхэмкІи ящІакъым. ЩІэныгъэм и зыужьыныгъэм хуэпабгъэ цІыхухэр дунейм щехыжым, уэсяткІэ медицинэ лэжьакІуэхэм къыхуагъэна я Іэпкълъэпкъхэр скан ящІащ, къыщІэкІ сурэтхэр бгъэбагъуэ хъуми, бгъэмащIэ хъуми урилэжьэну Іэрыхуэ зыщІ бжыгъэ программэхэм ирагъэувэжащ. Мы жыпхъэр абы нэмыщІауэ нэгъуэщІ зы ІуэхукІи щхьэпэщ - хирургием зыпызыщІэнум дежкІэ лъэщапІэ хъарзынэщ, зыпэрыувэну Іуэхум и щапхъэ нэсщ».
«Anatomage» щІэныгъэ-егъэджэныгъэ Іэмалым хуэдэ зиІэр Урысейм щыцІэрыІуэ медицинэ еджапІэ нэхъыщхьэхэращ. Абы Къэбэрдей-Балъкъэр къэрал университетыр зытет open.kbsu интернет утыр пыщІа хъун щхьэкІэ, информатизацэмкІэ къудамэм и ІэщІагъэлІхэм программэ щхьэхуэ зэхалъхьащ, канал куэд зиІэ видеозэпыщІэныгъэхэр къызэригъэпэщу, узэхуэтхэну Іэмал къыуиту, къигъэлъагъуэр птхырэ, иужькІэ щІэнІуатэхэм щыбгъэлъэгъуэж хъууэ.
«Anatomage»-м илъ щІэныгъэр и гъуазэу анатомиемкІэ екІуэкІар онлайн-щІэнІуатэ зыщыплІ къудейщ. Ауэ иджыпсту щыщІэдзауэ наІуэщ ар егъэджэныгъэм шэщІауэ къызэрыщагъэсэбэпынур.

ТАБЫЩ Мурат.
Поделиться: