ЩоджэнцIыкIу Алий и цIэр зезыхьэ Къэ­бэрдей къэрал драмэ театрым дыгъуасэ щызэхэтащ Дунейпсо Адыгэ Хасэм и XII Конгрессыр. Абы ДАХ-м блэкIа илъэси­-щым зэфIигъэкIахэр къыщапщытэжащ, зэман благъэм къапэщыт къалэнхэр щаубзыхуащ. ЗэIущIэр иригъэкIуэкIащ ДАХ-м и тхьэмадэу илъэс куэдкIэ лэжьа Нэхущ Заурбий. Зэхыхьэшхуэм къеблэгъащ Адыгэ, Къэрэшей-Шэрджэс республикэхэм, хамэ къэрал зыбжанэм щыпсэу ди лъэпкъэгъу­хэм я лIыкIуэхэр.

Конгрессым и Президиумым хэсащ ­КъБР-м и Iэтащхьэ КIуэкIуэ Юрий, КъШР-м и Правительствэм и тхьэмадэ Уэзы Аслъэн, ­УФ-м и Президентым Къэрал кIуэцI политикэмкIэ и управленэм и чэнджэщэгъу нэхъыщхьэ Мартынов Вадим, УФ-м и Президентым и полномочнэ лIыкIуэу Кавказ Ищхъэрэ федеральнэ округым щыIэм и Аппаратым и департаментым и унафэщI Глущенкэ Владимир, Адыгейм и лIыкIуэ Щхьэлахъуэ Аскэр, МэшбащIэ Исхьэкъ, Нэхущ Заурбий, ДАХ-м и къызэгъэ­пэщакIуэхэм ящыщ зы ­Рэджаб Фатхьи (Тырку) сымэ.
КIуэкIуэ Юрий ДАХ-м и зи чэзу зэхыхьэшхуэм кърихьэлIа делегатхэм гуапэу фIэхъус ярихащ икIи ехъуэхъуащ дуней псом щыпсэу адыгэхэм я дежкIэ мыхьэнэшхуэ зиIэ зэхуэ­-сыр купщIафIэ, щхьэпэ хъуну.
ДАХ-м и тхьэмадэ Сэхъурокъуэ Хьэутий Конгрессым хэтхэм зыубгъуауэ яхутепсэ­лъы­хьащ иужьрей илъэсищым ирагъэкIуэкIа лэжьыгъэхэм. А пIалъэм къриубыдэу ДАХ-м и Ревизионнэ комиссэм зэфIигъэкIахэр къы­зэщIикъуэжащ Адэмокъуэ Альберд.
ЗэIущIэм къыщыпсэлъахэр къытеувыIащ адыгэм и Iуэху дэкIыным ехьэлIа Iуэхугъуэхэм, лъэпкъым къылъыкъуэкI гугъуехьхэм хэкIы­пIэ яхуэхъунухэм. Зэхуэсышхуэм хэта деле­гатхэр зэдэарэзыуэ ДАХ-м и тхьэмадэу хахыжащ Сэхъурокъуэ Хьэутий. Вице-президенту хахащ Щоджэн Iэминат, Хасэм и гъэзэщIакIуэ комитетым хагъэхьащ Табыщ Муратрэ Щомахуэ Залинэрэ.