Къэбэрдей-Балъкъэрым и Жылагъуэ палатэм иджыблагъэ щытепсэлъыхьащ Урысей Федерацэм и Конституцэм халъ­хьэ зэхъуэкIыныгъэхэм теухуауэ екIуэкIыну къэралпсо щIэупщIэныгъэм и цIыхубэ кIэлъыплъыныгъэр къызэгъэпэща зэрыхъунум.
Iуэхум жыджэру тепсэлъыхьахэм ящыщщ КъБР-м и Жылагъуэ палатэм хэтхэр, абы и тхьэмадэ Берд Хьэзрэталий, республикэм и муниципальнэ IэнатIэхэм я жылагъуэ палатхэм я унафэщIхэу кърагъэблэгъахэр. Абыхэм къыхагъэщащ цIыху­бэ кIэлъыплъыныгъэр фIагъ ин хэлъу икIи зэщIэгъэуIуауэ къызэгъэпэщыным мы­хьэнэшхуэ зэриIэр.
ЗэIущIэм и купщIэ нэхъыщхьэ хъуащ «Къэралым и Хабзэ нэхъыщхьэм зэхъуэкIы­ныгъэ хэлъхьэныр дуней псом зэрыщрагъэкIуэкIыр» докладыр. Зыми и унафэм щIэмыт жылагъуэ къэпщытэныгъэр и щIэгъэкъуэну ар зэхилъхьащ икIи къызэхуэсахэм я пащхьэм кърилъхьащ КъБР-м и Жылагъуэ палатэм хэт, юридическэ щIэныгъэхэм я кандидат Мер Людмилэ. Абы хьэлэмэт куэд къызэщIиубыдащ.
Къэбэрдей-Балъкъэрым и Жылагъуэ палатэм и Аппаратым и унафэщI Дьяченкэ Аннэ, кIэлъыплъыныгъэм и къызэгъэпэ­щыкIэм щытепсэлъыхьым, къыхигъэщащ Конституцэм зэхъуэкIыныгъэхэр хэлъхьэ­ныр Федеральнэ Конституцэ Закон щхьэ­хуэкIэ зэрагъэзащIэр. «Мыбдежым къэралым и Iэтащхьэм и жэрдэмкIэ абы дыщIа­гъужащ цIыхубэм и фIэфIыныгъэр демократиер и лъаб­жьэу къэгъэлъэгъуэныр - урысейпсо IэIэтыр. Аращ унафэ пыухыкIар къыщащтэкIэ тегъэщIапIэ ящIынури», - жиIащ абы. АдэкIэ къызэхуэсахэр щыгъуа­зэ ищIащ цIыхубэ кIэлъыплъыныгъэр ­къы­зэгъэпэщынымкIэ муниципальнэ жы­лагъуэ палатэхэм дращIылIа зэгуры­Iуэны­гъэм Iэ зэрытрадзам. Къищынэ­мыщIауэ, Дьяченкэ къигъэлъэгъуащ жылагъуэ кIэ­лъыплъа­кIуэхэм хэтынухэм я спискэхэр зэрагъэ­хьэзыр щIыкIэр.
ЗэIущIэм къыщыпсэлъа КъБР-м и Жылагъуэ палатэм Хабзэр гъэзэщIэнымкIэ, цIы­хум и хуитыныгъэхэмкIэ, Iулъхьэ тын-къе­Iыхыным пэщIэтынымкIэ и комиссэм и уна­фэщI Бажэ Дотий къыхигъэщащ: «Граждан жылагъуэм и институтхэр жыджэру зэрыхэтыр щыхьэт техъуэнущ IэIэтыр къабзэу, зэIухауэ зэрекIуэкIым. КIэлъыплъыныгъэ ткIийхэм Iэмал къатынукъым демократиер зи лъабжьэ Iэмалхэмрэ цIыхухэм я ­хуитыныгъэхэмрэ къызэпаудыну».
Iуащхьэмахуэ муниципальнэ щIыналъэм и Жылагъуэ палатэм и тхьэмадэ Узденов Магомед зэIущIэм хэтхэр щигъэгъуэзащ кIэ­лъыплъакIуэхэр къыхэхынымкIэ я щIы­пIэм щекIуэкI лэжьыгъэм. Абы къыхигъэщащ спискэхэр зэхэгъэувэныр зэман кIэ­щIым зэрекIуэкIыр икIи цIыху куэдым нэхъ­ зыхуэфащэхэр псынщIэу къахыхын зэры­хуейр.
Конституцэм халъхьэну зэхъуэкIыныгъэ­хэм ехьэлIа IэIэтыр щекIуэкIыну пIалъэр Уры­сей Федерацэм и Президентым зэригъэ­Iэпхъуар къалъытэри, зэIущIэм хэтхэм унафэ къащтащ абы зыхуэгъэ­хьэ­зырыным республикэм адэкIи щыпащэну.
КъБР-м и Жылагъуэ палатэм и пресс-IуэхущIапIэм дызэрыщигъэгъуэзамкIэ, коронавирус уз зэрыцIалэм къиша щытыкIэ гугъум къыхэкIыу, мы зэхуэсыр ирагъэкIуэкIащ къыхуагъэува санитар-гигиенэ мардэ псори ткIийуэ ягъэзащIэу.