Урысей Федерацэм и Федеральнэ Зэхуэсым ФедерацэмкIэ и Советым КъБР-м къыбгъэдэкIыу хэт сенатор Къанокъуэ Арсен хэлъ цIыхугъэр, къыщалъхуа Къэбэрдей-Балъкъэрым къыхуиIэ гулъытэр зыхуэдизыр куэдым ящIэ.
Иджыпсту ди къэралри нэгъуэщI щIыналъэ куэди зыпэщIэува гугъуехьым и хэку цIыкIур къыхэкIа зэ- рыхъуным емыгупсысу къэнакъым Къанокъуэр. Абы Инстаграмым щиIэ напэкIуэцIым мы махуэхэм къритхащ: «Эпидемием ебэныным сэри си къару хэслъхьэну мурад сщIащ - Налшык къалэ дэт «Синдика» интур-хьэщIэщымрэ узыншагъэр щрагъэфIакIуэ-зыщагъэхъуж комплексымрэ, хуэныкъуэ хъумэ, КъБР-м Узыншагъэр хъумэнымкIэ и министерствэм хуит хуэсщIынущ, сымаджэхэр щIагъэгъуэлъхьэн папщIэ. Зи гугъу сщIы IуэхущIапIитIым гъуэлъыпIи 160-рэ щIэтщ. КъищынэмыщIауэ, иджыпсту Китай компанием зэгурыIуэныгъэ идощIылIэ ИВЛ аппаратхэмрэ коронавирусыр къызэрахутэ тест Iэмэпсымэхэмрэ къэтщэхун папщIэ».
Къанокъуэ Арсен жиIащ мы тхьэмахуэм и кIуэцIкIэ, нэкIуIупхъуэ мини 100 КъБР-м къригъашэу, цIыхухэм пщIэншэу хуагуэшыну. «Синдика» компаниер хьэзырщ, ди цIыхубэр узым щыхъума хъун щхьэкIэ, Къэбэрдей-Балъкъэрым и УнафэщIхэм сыт и лъэныкъуэкIи защIигъэкъуэну.
«Хуабжьу си жагъуэ мэхъу уз зэрыцIалэр ди республикэм исхэм ящыщхэми къазэрыжьэхэуар. Ауэ абыхэм я щытыкIэр нэхъыфI мэхъу. Тхьэм ящхьэщих!
Вирусыр нэхъ зытегушхуэр ныбжь зиIэхэращ. Абы къыхэкIыу фыкъыхузоджэ нэхъыжьхэм гулъытэ хэха яхуэфщIыну, Iэмал зэриIэкIэ, уэрамхэм къыдэвмыгъэхьэну, ерыскъыхэкIхэмрэ хущхъуэхэмрэ къащэхунымкIэ сэбэп фахуэхъуну. Вирусым къихьа гугъуехьым нэрылъагъу ищIащ дунейм цIыхуу тетыр зы кхъухь зэрызэдисыр, политикэ, экономикэ зэпыщIэныгъэхэм я мызакъуэу, псэуныгъэм ехьэлIа IуэхугъуэхэмкIи хуабжьу зэрызэпхар. Зы цIы-хум и гупсысэ зэтеубыдам, хэлъ жэуаплыныгъэм цIыху гъащIэ мин бжыгъэ елъытащ.
Си фIэщ мэхъу, эпидемиологхэм я чэнджэщхэмрэ къэрал псор зытехьа карантин псэукIэмрэ дытетмэ, дызыхэхуа гугъуехьыр псынщIэу къызэрызэднэкIыфынур.
Фи щхьэмрэ фи Iыхьлыхэмрэ фхъумэ! Узыншагъэ Тхьэм къывит!», - етх Къанокъуэм.
Апхуэдэ дэIэпыкъуныгъэмрэ зэкъуэтыныгъэмрэ цIыхущхьэр къызэрыригъэлынум шэч хэлъкъым. Дызыхуэвгъэсакъыж!