КъМР-ни Башчысы Юрий Коков тюнене Правительствону юйюнде Министрлени кабинети бла жылны аллындан бери озгъан 9 айны ичинде республиканы социальный сферасын бла экономикасын айнытыуда эсеплени тинтгенди. Сёз бюджетни толтурууну, социальный объектлени къурулушларын битдириуню, эл мюлкде халны, къыш сууукълагъа хазырланыуну эм алача башха магъаналы ишлени юслеринден баргъанды.
Жылны аллындан бери озгъан 9 айны ичинде социальный сферада бла экономикада тамамланнган жумушланы юслеринден премьер-министр Мусукланы Алий билдиргенди. Ол келтирген шартлагъа кёре, макроэкономиканы битеу бёлюмлеринде да ёсюу барды эмда жылны ахырына дери тарихлени энтта игилендирирге белгиленеди.
Сёз ючюн, эл мюлк бла кюрешгенле будай орадыла, нартюхню жыйып башлагъандыла. «2016 жыл КъМР-ге иги да жетишимли болгъан эди. Ол кезиуде миллион тоннадан артыкъ будай жыйылгъанды. Быйыл а ол кёрюмдюге 6 процент къошаргъа мурат барды»,- дегенди Мусукланы Алий.
Тахта-кёгетлени тирлиги да быйыл иги болгъанды: былтырны кёрюмдюлерин 20 процентге озаргъа белгиленеди. Аны бла байламлы консервала жарашдыргъан предприятияла да чыгъаргъан продукцияларын ёсдюрлюкдиле.
Бюджетни юсюнден айтханда уа, жылны аллындан бери озгъан 8 айны ичинде аны файдала бёлюмюн кёбейтип, 19,5 миллиардха жетдирирге къолдан келгенди. Ол а былтырны кёрюмдюлеринден 35 процентге асламды, ол санда республиканы кесини файдалары 27 процентге ёсгендиле. Мусукланы Алийни айтханына кёре, федерал власть органла бла 40-дан аслам келишим этилгенди, аланы чеклеринде республикагъа федерал арадан берилген ахча да кёбейгенди.
Бюджетни аяулу жюрютюу жаны бла буйрукъну чеклеринде аны къоранчлары азайтылгъандыла. «Ахчаны 70 проценти социал магъаналы жумушлагъа къоратылгъанды, ол санда айлыкъны, тюрлю-тюрлю пособияланы тёлеуге, льготалы дарманла бла жалчытыугъа. Алай бла ол 1,5 миллиард сом профицит бла къуралгъанды, ол а къырал борчну азайтыргъа онг бергенди»,-деп къошханды докладчы.
Алий Тахирович билдиргенича, федерал власть органла бла этилген келишимлени чеклеринде республикада 430 объект ишлетирге, тюрлю-тюрлю жумушла тамамларгъа белгиленеди. Алай бла сабий садла, школла, спорт учрежденияла ишленедиле, элледе 11 маданият юйде жангыртыу жумушла толтуруладыла, кёп къатлы юйлени арбазлары тапландырыладыла.
Бюгюнлюкде уа Правительство келир жылны социал-экономикасын айнытыуну прогноз планын бла 2019 жылны бюджетин къурайды. Документле жарашдырылып, Парламентни къараууна берилликдиле.
Юрий Коков документлени хазырлагъанда кемчиликлени болдурмазгъа кереклисин чертгенди. Премьер-министрни биринчи орунбасары Мурат Керефовха, ол а бюджет сферада соруулагъа жууаплыды, ведомстволаны араларында байламлыкъланы кючлерге, бюджетни, прогнозну жарашдыргъанда аны качествосун контрольда тутаргъа кереклисин эсгертгенди.