«Акрополь» той-оюн араны отоуларындан биринде битеуроссей, регион, республикалы, шахар конкурсланы лауреатлары Арсен Зеушевны бла Элина Берхамованы чыгъармаларындан кёрмюч къуралгъанды.
Бу эки художник къараучулагъа кёргюзтюрге жюзге жууукъ сурат, скульптура да келтиргендиле.Арсен бла Элина алыкъа жашдыла, чыгъармачылыкъ жоллары да энди башланады, болсада кёрмючге келген уста эмда атлары айтылгъан художникле Руслан Цримов, Анатолий Жилов, искусствовед Нина Леонтьева, культурада ишлегенлени профсоюзларыны рескомуну таматасы Марьяна Даова, башхала да жаш, къыз да усталыкъ жаны бла бек иги даражагъа жетгенлерин чертгендиле.
Арсенни "Рыбалка Тора", "Метаморфоза 1", "Метаморфоза 2", "Фантом 1", "ХХ1 ёмюр", "Адам акъыллы электроник" эм башха суратларына бла скульптураларына дайым къарап турлугъунг келеди. Ала бары да сагъыш этдиредиле, аланы энергетикалары къарагъаннга кюч бередиле. Берхамованы «Жаз келди», «Чирик кёл кюз артында», «Таулада гюлле» деген эм башха чыгъармаларыны ариу, жарыкъ бояулары къыш сууукъда жылытадыла.
Кёрмючню графикалы бёлюмю да эс бурурчады. Ол уллуду, сейирликди.
-Къарайма да, къууанама,- дейди пенсиячы Марина Абазова. - Муну юсюнден бир ай мындан алгъа эшитгенме. Тюзюн айтсам, сакълап да тургъанма. Арсенни ишлери сагъышландыра эселе, Элинаныкъыла кёзюнгю, жюрегинги къууандырадыла. Мен бир ненча кере къайтып къарадым алагъа. Хар художник да кесилиги бла айырмалыды.
-Мен а бизни быллай жаш адамларыбыз болгъаны ёхтемленеме. Быланы фахмулулукълары кёзге туурады. Элинаны ишлерине къарап, Чегем чучхурлагъа, Чирик кёлню жагъасына да барлыгъынг келеди, кертида къалай ариуду бу табийгъатдеп, жангыдан къайтып къарарыгъынг келеди, -дегенди белгили предприниматель эмда меценат Лариса Бабугоева.
Акрополь-Центрде къуралгъан аламат кёрмючге къараргъа башда атлары айтылгъан адамладан сора да, жаш художниклени жууукълары, ахлулары, шуёхлары, танышлары да кёп санда келгендиле. Бары да республиканы маданият кёгюнде эки жарыкъ жулдуз чыгъып келгенин чертгендиле.
Арсен Зеушев сурат ишлеу бла бек гитче заманындан бери кюрешеди, анга кеси аллына юйреннгенди. Чыгъармачылыгъын сюрреализм бла байламлы этгенди. Усталыгъын андан ары ёсдюрюрге сюйгенин билдиргенди.
Элина Берхамовагъауа жаланда онжети жыл болады.Ол табийгъатны суратларгъа бек сюеди.Быйыл Москвада дизайнерлени хазырлагъан бийик окъуу юйге кирир мураты барды.
