Республиканы законла чыгъарыучу баш органыны президиуму кезиулю жыйылыуун ётдюргенди. Аны Къабарты-Малкъар Республиканы Парламентини Председатели Татьяна Егорова бардыргъанды. Анда КъМР-ни Парламентини жыйылыуун кезиуюнден алгъа чакъырыуну юсюнден сёз баргъанды .
Аны 2020 жылны 26 февралында КъМР-ни Правительствосуну юйюнде бардырыргъа оноу этилгенди. Анда жаланда бир соруугъа къараллыкъды – «Къабарты-Малкъар Республиканы Башчысыны Къабарты-Малкъар Республиканы Парламентине Посланиясыны юсюнден».
Президиумну жыйылыуунда депутатла дагъыда «Урунууну ветераны» деген махтаулу ат атауну болумларыны бла низамыны юсюнден КъМР-ни Законуну 2-чи статьясына тюзетиуле кийириуню юсюнден» законопроектни сюзгендиле. Аны «Къабарты-Малкъар Республиканы профсоюз организацияларыны биригиую» Союз хазырлагъанды.
Документ «Урунууну ветераны» деген атха тийишли болур ючюн, керек болгъан ведомстволу айырма белгилени алыуну тынчыракъ этер эмда жамауат биригиулени, саулукъ сакълауну, къырал власть органлагъа кирмеген организацияланы бла махкемелени уруннганларыны, профсоюз ишчилени да сейирлерин къоруулар муратда жарашдырылгъанды. Ол битеу тийишли жерлеге тюзетиулени хазырлар ючюн жиберилгенди. Тынгылы сюзюлгенден сора законопроектге КъМР-ни Парламентини кезиулю жыйылыуунда къараргъа белгиленеди.
Кенгешде дагъыда федерал законланы проектлери, РФ-ни башха субъектлерини законла чыгъарыу жаны бла башламчылыкълары да сюзюлгендиле эмда РФ-ни Жер эмда Агъач кодекслерине тюрлениуле кийирилгендиле.