Кавказ Ищхъэрэм зегъэужьыным пыщIауэ япэ игъэщыпхъэ Iуэхухэм ятеу­хуауэ УФ-м Къэзыбж и палатэм и уна­фэщI Кудрин Алексей дыгъуасэ Москва щригъэкIуэкIа стратегие сессием хэтащ КъБР-м и Iэтащхьэ КIуэкIуэ Казбек.
ЗэIущIэм щытепсэлъыхьащ Кавказ Ищхъэрэ федеральнэ округым зегъэужьынымкIэ къалэн нэхъыщхьэхэм, Де­мографием, узыншагъэр хъумэным, егъэджэныгъэм, псэупIэмрэ къалэм зегъэужьынымрэ, экологием, хьэрычэт мыинымрэ курытымрэ, бизнесым зыщIэгъэкъуэным ехьэлIа къэрал программэхэр зэрагъэзащIэм, лъэпкъ мурадхэр зэрызэрагъэхъулIэр.
КъызэратамкIэ, «Кавказ Ищхъэрэ федеральнэ округым зегъэужьыныр» федеральнэ къэрал программэм хэплъэжыпхъэщ. ЩIыналъэм иджыпсту щыубзыхун хуейщ зыужьыныгъэм и унэтIыныгъэ нэхъыщхьэхэр, ар тещIыхьауэ щытын хуейщ округым ис лъэпкъхэр къадекIуэкI хабзэхэм, абы щыIэ ефIэкIыныгъэхэмрэ ­гугъуехьхэмрэ.
«Дэ Iуэхум нэхъ къезэгъ иджырей стратегиер игъэхьэзырыну правительствэм дыщогугъ. А стратегием лъабжьэ хуэхъун хуейщ лъэпкъ мурадхэмрэ проект пыу­хыкIахэмрэ къагъэувхэр гъэзэщIэныр», - къыхигъэщхьэхукIащ УФ-м къэзыбж и палатэм и унафэщI Кудрин Алексей. Ап­хуэдэу абы жиIащ Кавказ Ищхъэрэ ­щIыналъэр къулейсызу зэрыщымытыр, адэ­кIи зиужьын папщIэ абы лъабжьэ ­тэ­мэм зэриIэр. Апхуэдэ хэкIыпIэхэм ящыщщ туризмэр, мэкъумэш хозяйствэр, нэ­гъуэщI IэнатIэхэри.
Къалэн нэхъыщхьэ дыдэхэм ящыщу ­къалъытащ уней мылъкур къэгъэ­сэбэпыныр, коррупцэм ебэныныр, туризмэм и иджырей инфраструктурэр зэтегъэувэныр, Iуэхутхьэбзэхэм я фIагъыр къэIэтыныр, шынагъуэншагъэ къызэгъэ­пэщыныр, IэнатIэхэм зэрызиужь IэщIагъэлIхэр гъэхьэзырыныр.
Хэхауэ тепсэлъыхьащ щIыналъэм бжыгъэхэр зи лъабжьэ технологиехэм зыщегъэужьыным. ЗэрыжаIамкIэ, къэрал, муниципальнэ Iуэхутхьэбзэхэр нэхъ тэмэму ягъэзэщIэн папщIэ мы гъэм интернет-сервисыщIэ лажьэу яутIыпщынущ. Абы и фIыщIэкIэ нэрылъагъуу нэхъ ефIэкIуэнущ цIыхухэм я тхыгъэхэм, лъэIухэм жэ­уапхэр зэрырат щIыкIэр.
Iуэху нэхъыщхьэхэм ятеухуа докладхэр сессием щащIащ УФ-м Къэзыбж и палатэм и унафэщI Кудрин А. Л., УФ-м и Правительствэм и УнафэщIым и къуэдзэ - УФ-м и Президентым и полномочнэ лIы­кIуэу Дальневосточнэ федеральнэ округым щыIэ Трутнев Ю. П., УФ-м и Пре­зидентым и полномочнэ лIыкIуэу Кавказ Ищхъэрэ федеральнэ округым щы­Iэм и къуэдзэ Гурьев В. В., УФ-м экономикэ зыужьыныгъэмкIэ и министр Решетников М. Г., УФ-м финансхэмкIэ и минист­рым и япэ къуэдзэ Горнин Л. В., Дагъыс­тэн Республикэм и Iэтащхьэ Васильев­ В. А.­ сымэ, аудиторхэм, экспертхэм.
ЗэIущIэм апхуэдэу хэтащ Урысей Федерацэм и Президентым и полномочнэ лIыкIуэу Кавказ Ищхъэрэ федеральнэ округым щыIэ Чайкэ Ю. Я., Урысей Федерацэм и Федеральнэ прокурорым и къуэдзэ Демишин Д. В., Кавказ Ищхъэрэ федеральнэ округым и субектхэм я Iэтащхьэхэр.