|
Армавир дэт Адыгэ Хасэр ягъэлъапIэ.
10 февраля, 2020 - 07:00
Краснодар крайм хыхьэ Армавир къалэм ЩэнхабзэмкIэ и уардэунэм Iэтауэ щагъэлъэпIащ а щIыпIэм щылажьэ Адыгэ Хасэр къызэрызэрагъэпэщрэ илъэс 15 зэрырикъур. ГуфIэгъуэ зэIущIэм кърихьэлIат Дунейпсо Адыгэ Хасэм и лIыкIуэхэу Къэрэшей-Шэрджэс, Къэбэрдей-Балъкъэр, Адыгэ республикэхэм, Ставрополь крайм, Успенскэ щIыналъэм икIахэр.
Къызэхуэсахэм псалъэ гуапэкIэ захуигъэзащ Армавир дэт Адыгэ Хасэм и тхьэмадэ Шанэ Рэмэзан. Ар зыубгъуауэ тепсэлъыхьащ Хасэм и къежьэкIам, ар зэрызэфIэувам. Апхуэдэуи зэман блэкIахэм абы хэтахэм, хэлэжьыхьахэм я гугъуи ищIащ.
Армавир къалэм и Iэтащхьэм и къуэдзэ Руденкэ Александр тепсэлъыхьащ къыдэкIуэтей щIэблэр гъэсэным ехьэлIауэ хасэм лэжьыгъэшхуэ зэрыригъэкIуэкIым, абы и лъэныкъуэкIи Шанэ Рэмэзан фIыщIэшхуэ зэрыбгъэдэлъыр къыхигъэщащ.
-Лъэпкъ зэныбжьэгъугъэр егъэфIэкIуэнымкIэ, щэнхабзэр, тхыдэр куууэ джынымкIэ, гъэсэныгъэ дахэ яхэлъу сабийхэр къэгъэтэджынымкIэ Армавир къалэм щылажьэ Адыгэ Хасэм зэфIигъэкI Iуэхухэм я мыхьэнэр къыпхуэмылъытэну инщ. Япэ, ЕтIуанэ дунейпсо зауэхэм щыгъуэ адыгэ лъэпкъым и къуэ пэжхэр Хэкур хъумэным зэрыщIэзэуар, ди лъэпкъэгъухэм я гъусэу абыхэм ящыщ куэдым я псэр ди щхьэхуитыныгъэм зэрыщIатар дэ тщыгъупщэну дыхуиткъым. Абы папщIэ адыгэ лъэпкъым фIыщIэ фхуэтщIыну къыттохуэ, - жиIащ Армавир къалэ Думэм и тхьэмадэ Поляков Александр.
Лъэпкъ зэпыщIэныгъэхэр гъэбыдэнымкIэ къалэм и консультант нэхъыщхьэ Грещанов Александр къызэхуэсахэм захуигъэзащ:
-Ныбжьэгъу лъапIэхэ, си гуапэу фи гуфIэгъуэр вдызоIыгъ. Адыгэхэм фи хьэл-щэн дахэмкIэ, фи лъэпкъ фащэмкIэ, нэгъуэщI фIы куэдкIи дыщызэдэпсэу щIыналъэм щыпсэу адрей лъэпкъхэм факъыхощ. Илъэс 15 дэкIам Хасэм куэд хузэфIэкIащ. Дыфщогугъ фи ехъулIэныгъэфIхэм хэмыщIу дяпэкIи фылэжьэну.
-Мы зэIущIэ дахэм кърихьэлIа псоми сывигъусэу си гуапэу вдызогъэлъапIэ фи махуэр. Зэман мащIэм къриубыдэу Адыгэ Хасэм куэд хузэфIэкIащ. НэхъыбэжкIи дыщогугъ. Тхьэм къывигъэхъулIэ фи хъуэпсапIэ псори, - пэшым щIэсхэм захуигъэзащ Краснодар крайм и Успенскэ щIыналъэм и Iэтащхьэ Бахилин Геннадий.
Адыгэ Республикэм лъэпкъ IуэхухэмкIэ и комитетым и тхьэмадэ Щхьэлахъуэ Аскэр жиIащ къалэ Адыгэ Хасэм и Iуэхухэр дяпэкIи ефIакIуэрэ и зэфIэкIхэми хигъахъуэу екIуэкIыну зэригуапэр. Щхьэлахъуэр къеджащ Адыгэ Республикэм и Iэтащхьэ КъумпIыл Мурат къыбгъэдэкI хъуэхъу тхыгъэми.
Къэрэшей-Шэрджэсым и «Адыгэ Хасэ - Шэрджэс Парламент» жылагъуэ зэгухьэныгъэм и тхьэмадэ Аслъэн Алий псалъэ ирата иужь, къыхигъэщащ адыгэхэм Хасэ яIэу, абы лъэпкъым ехьэлIа Iуэхугъуэ нэхъыщхьэхэр къыщаIэту къызэрекIуэкIыр.
-Илъэс 15-р зэманышхуэкъым, ауэ лъэпкъ Iуэху зепхуэну ар икIи мащIэкъым. Сынывохъуэхъу зэгурыIуэныгъэ фи зэхуаку дэлъу, фи ехъулIэныгъэфIхэми къыхэвгъахъуэу, адэкIи фылэжьэну, - жиIащ абы.
Шэрджэс Хасэм и тхьэмадэм и къуэдзэ Бэгъущэ Алий Армавир Адыгэ Хасэм и къызэгъэпэщакIуэхэм хъуэхъу псалъэкIэ захуигъэза нэужь, зэрызэдэлажьэм, адыгэбзэр щIэблэм нэхъ куууэ егъэджыным хуэунэтIауэ жылагъуэ зэгухьэныгъитIым ящIапхъэхэм, абы теухуауэ ягъэхьэзыра проектым я гугъу ищIащ.
ДАХ-м и тхьэмадэм и япэ къуэдзэ Бырсекъуэ Орфанрэ ХьэтIохъущокъуэ Къазий и цIэр зезыхьэ Адыгэ Хасэм и тхьэмадэ Табыщ Муратрэ ДАХ-м къыбгъэдэкI фIыщIэ тхылъхэмкIэ Армавир Адыгэ Хасэм хэтхэр ягъэпэжащ. Бырсекъуэ Орфан Дунейпсо Адыгэ Хасэм къыбгъэдэкIыу къыщыпсалъэм жиIащ Армавир Адыгэ Хасэр жыджэру ДАХ-м зэры-дэлажьэр, я зэпыщIэныгъэхэр зэрыбыдэр.
-Армавир деж щыс адыгэхэр мащIэми, я бзэр зэрахъумэжыным, я хабзэр зэрызэрахьэжыным яужь иту, я Iуэху ягъэкIуатэ. Ар узыщыгуфIыкIыпхъэщ. Фи хъуэпсапIэхэри, фи мурадхэри Тхьэм къывигъэхъулIэ, - жиIащ Табыщ Мурат.
Ставрополь крайм щыIэ Адыгэ Хасэм и тхьэмадэ Шыбзыхъуэ Юрэ и гугъу ищIащ дызэрыадыгэр тщымыгъупщэу, дызыдэпсэу лъэпкъхэм фIыкIэ дакъыхэщу, ипэкIэ дыкIуэтэн зэрыхуейр.
-Абы и лъэныкъуэкIэ Армавир Адыгэ Хасэм игъэлъагъуэ щапхъэр дерс къызыхэпхынщи, афэрым, си гуапэщ фефIакIуэмэ, - захуигъэзащ пэшым щIэсхэм Шыбзыхъуэм.
Адыгэ Республикэм къикIа жылагъуэ лэжьакIуэ Шумахуэ Энвер, Армавир къалэм и имам Раджабов Хьэсбулэт сымэ, апхуэдэуи, Армавир щыпсэу нэгъуэщI лъэпкъхэм я жылагъуэ зэгухьэныгъэхэм я тхьэмадэхэми Армавир «Адыгэ Хасэм» хъуэхъу псалъэхэмкIэ зыкъыхуагъэзащ.
Пщыхьэщхьэр ягъэдэхащ Нэхей Аслъэн зи унафэщI, Адыгэ Республикэм и «Ислъэмей» къэрал ансамблым и къэфакIуэхэм, уэрэджыIакIуэхэм.
|
20.04.2024 - 12:25 Къэрал куэдым мэлыжьыхьым и 19-р «Ажэгъуэмэм и махуэу» щагъэлъапIэ. Абы гулъытэ хэIэтыкIа хуэщIыпхъэу къалъытэу, япэ дыдэу, I984 гъэм, Iуэхур къыщрахьэжьар Инджылыз къэралыгъуэрщ. |
|
20.04.2024 - 09:03 Къэбэрдей-Балъкъэр Республикэм мы гъэм еханэу щекIуэкIынущ «ТекIуэныгъэм и диктанткIэ» зэджэ, гъэсэныгъэ мыхьэнэшхуэ зиIэ Iуэхугъуэ щхьэпэр. |
|
19.04.2024 - 09:01 Тамбукъан гуэл шыугъэм илъэс 700 тхыдэ къызэринэкIащ. Абы ит псыр ижыркъым, мыл ткIужхэмрэ уэшххэмкIэ ирикъуу аращ. Абыхэм къадэкIуэу ябрууауэ щыта жапIэхэмкIэ абы хохъуэ минеральнэ псы. |
|
19.04.2024 - 09:01 2024 гъэм и япэ мазищым къызэрагъэлъагъуамкIэ, хьэщIэщым къыщыувыIэну махуэу зыщрагъэтхамрэ абы щыщIэтIысхьа махуэмрэ я зэхуакум дэлъ пIалъэм и кIыхьагъымкIэ Къэбэрдей-Балъкъэрым къэралым и щIыналъ |
|
18.04.2024 - 12:25 2024 гъэм и япэ мазищым къриубыдэу Къэбэрдей-Балъкъэрым зыщызыплъыхьыну къэкIуа туристхэм я бжыгъэр мин 398-рэ хъуащ икIи ар процент 24,8-кIэ нэхъыбэщ къапщытэж лъэхъэнэм ирихьэлIэу нэгъабэ щыIа бж |
|