21 январьда РФ-ни Президенти Владимир Путин жангы Правительствону къурамыны юсюнден Указгъа къол салгъанды. Анга кёре Правительствону Председателини тогъуз орунбасары боллукъду. Жангы вице-премьерлеге Дмитрий Чернышенко, Андрей Белоусов, Марат Хуснуллин, Дмитрий Григоренко, Виктория Абрамченко, Алексей Оверчук салыннгандыла. Андрей Белоусов Правительствону Председателини биринчи орунбасарына тийишли кёрюлгенди. Ол алгъын къыралны башчысыны экономика жаны бла кенгешчиси болгъанды.
Министрлени юслеринден айтханда, Указгъа кёре кюч структураланы башчылары, юстиция министрден башхалары, жангы Правительствода къуллукъларын сакълаялгъандыла. Сергей Шойгу къоруулау министрлей, Евгений Зиничев – МЧС-ни, Владимир Колокольцев - МВД-ны башчылары болгъанлай къалгъандыла.
РФ-ни юстиция министрине уа вице-премьер, Правительствону аппаратыны башчысы Константин Чуйченко салыннганды. Антон Силуанов финансла министри, Денис Мантуров РФ-ни Промышленность эмда сатыу-алыу министерствосуну таматасы, Сергей Лавров РФ-ни тыш къыралла бла ишлерини министри болгъанлай къалгъандыла. Евгений Дитрих транспорт министрге жангыдан салыннганды. Энергетика министерствогъа энтта да Александр Новак башчылыкъ этерикди, Дмитрий Кобылкин да табийгъат байлыкъла эмда экология министрни къуллугъундан таймагъанды. Дмитрий Патрушев да РФ-ни эл мюлк министрини къуллугъун андан ары толтурлукъду.
Россейни Экономиканы айнытыу министерствосуну башчысына уа Пермь крайны губернатору Максим Решетников салыннганды. Урунууну министрине финансла министрни орунбасары болуп тургъан Антон Котяков тийишли кёрюлгенди. Владимир Якушев къурулушну министри болгъанлай къалгъанды.
Алгъыннгы Правительствону социал бёлюмюню министрлери уа барысы да алышыннгандыла. Саулукъ сакълау министерствону башчысына Вероника Скворцованы орунуна Росздравнадзорну таматасы Михаил Мурашко салыннганды. РФ-ни маданият министрини къуллугъунда уа Владимир Мединскийни кинематография департаментни таматасы Ольга Любимова алышындыргъанды. Жарыкъландырыу министерствогъа энди Рособрнадзорну таматасы Сергей Кравцов оноу этерикди, илму эмда бийик билим бериу министри уа энди Валерий Фальковду.
РФ-ни Цифралы айныу, связь эмда асламлы коммуникацияла министерствосуна Константин Носковну орунуна "Ростелекомну" цифралы платформала жаны бла вице-президенти Максут Шадаев башчылыкъ этерикди. Спорт министрге Олег Матыцин салыннганды. Узакъ Кюнчыгъышны бла Арктиканы айнытыуну министри Александр Козлов болгъанлай къалгъанды.
