КъБР-м и Iэтащхьэ КIуэкIуэ Юрий дыгъуасэ къызэIуихащ Калюжнэ уэрамым ирикIуэ гъуэгу зэрагъэпэщыжар. Абы хэтащ УФ-м и Къэрал Думэм и депутат, футболист цIэрыIуэу щыта Газзаев Валерий, КъБР-м и Правительствэмрэ Парламентымрэ я лIыкIуэхэр, дин, жылагъуэ лэжьакIуэхэр, нэхъыжьхэмрэ щIалэгъуалэмрэ.
Республикэм щыпсэухэм защыхуигъазэм, КъБР-м и Iэтащхьэм къыхигъэщащ Iуэхум и мыхьэнэр нэхъри ин зэрищIыр фокIадэм и 1-м Къэбэрдей-Балъкъэрым и Къэралыгъуэмрэ ЩIэныгъэмрэ я махуэшхуэхэр зэрагъэлъапIэм зэрытехуам.
- Мыпхуэдэ лэжьыгъэ къыщызэбнэкIым деж нэхъри утрегъэгушхуэ цIыхухэм я псэукIэр езыгъэфIэкIуэн Iуэху нэхъыбэ зэрызэфIэбгъэкIыным. Илъэс куэд хъуауэ дегупсысырт мы уэрамыр зэIузэпэщ зэрытщIыну Iэмалхэм икIи икъукIэ си гуапэщ республикэм щыпсэу- хэр зыщыгуфIыкIыну лэжьыгъэм дызэрыпэлъэщар, - жиIащ КIуэкIуэ Юрий. – Мы гъуэгур сэбэп хъунущ къалэкум автомашинэхэр щызэтримыхьэнымкIэ. Урысей Федерацэм и Президент Путин Владимир къытхуигъэув къалэн пажэхэм ящыщ Iуэху зэфIэтхащ - ар, зэрыжысIащи, цIыхухэм я псэукIэр едгъэфIэкIуэну ди пщэрылъу зэрыщытырщ. ЦIыхухэр зыгъэпIейтей, илъэс куэд хъуауэ унафэ зымыгъуэт мы Iуэхур зэрызэфIэтхам сыщогуфIыкI. Сыщогугъ Налшык къалэм и мызакъуэу, республикэм щыпсэу псори мы гъуэгум арэзы ищIыну.
Калюжнэ уэрамым къыщызэIуаха гъуэгущIэр япэ категорием хохьэ, лъэныкъуиплIу гуэшащ, уэшхыпсыр зэ- рылъэдэнухэр хуащIащ, лъэс лъагъуэхэмрэ машинэ гъэувыпIэхэмрэ иIэщ, гъуэгубгъухэр къагъэнэхуащ. Калюжнэм къыдэкIуэу, Эльбрусскэ, Комаровэ, Щэрданым, КIыщокъуэм, Толстойм я уэрамхэри зэрагъэпэщыжащ.
КъБР-м и Iэтащхьэм фIыщIэ яхуищIащ архитектор-хэм, гъуэгу IэнатIэм, «Водоканал» IуэхущIапIэм, электросетым я лэжьакIуэхэм. Зы жэщ-махуэм ику иту машинэ мин 30-м нэблагъэ абы щызэблэкIыфынущ.
ГъуэгущIэр къыщызэIуахым япэу ирикIуэну хуит ящIащ техникэ хэхахэмрэ хьэлъэзешэхэмрэ. Абыхэм якIэлъыкIуащ «Эдельвейс» клубым хэт картингист ныбжьыщIэхэр. Къыхэгъэщыпхъэщ, картингым республикэм зыщиужьын 1973 гъэм и жэпуэгъуэм щIидзауэ зэрыщытар. Гъуэгум ирикIуэну зыхуагъэфэщахэм яхэтт Налшык 2006 гъэм къыщызэIуаха пасэрей автомобиль клубым и машинэхэр. Автоколоннэм хэту уэрамым ирикIуащ мотоциклистхэмрэ цIыхубэр къезышэкI транспорт зыбжанэрэ.
КIуэкIуэ Юрий а махуэм къызэIуихащ «Б. Браун Ави-тум Руссланд» ООО-м япэу Къэбэрдей-Балъкъэрым щиухуа (къэралым апхуэдэу 56-рэ щегъэлажьэ) ДиализымкIэ центрыщIэр. Ар инвесторхэм я ахъшэкIэ яухуащ икIи пщIэншэу абдеж сымаджэхэм Iуэхутхьэбзэхэр щыхуащIэнущ.