Маликаны уллу хорламлары алдадыла.

«Звезда» каналны «Жангы жулдуз -2020» деген жыр конкурсуну ахыр эсеплери тохташдырылгъандыла. Анга къатышхан таулу къыз Атабийланы Малика ючюн къол кётюргенлени саны 24,66 процентни тутханды. Биринчи жерге чыкъгъан къалмукълу жырчы Лиджи Горяевдан ол жаланда 7 процентге артха къалгъанды. Алай бла Къабарты-Малкъар Республика «кюмюшге» тийишли болгъанды бу проектде.Маликаны бу жетишими бла КъМР-ни Башчысы Казбек Коков да алгъышлагъанды эм аны уллу хорламлары алда болгъанларына ийнаныуун билдиргенди.
Эришиуню баш саугъасын бериу а «Звезда» каналда тюзюнлей эфирде бардырылгъанды. Малика аны ючюн къайгъырып, къол кётюргенлеге ыспас сёзлени къызгъанмагъанды. Кертиси бла да, 28 адамдан саулай къыралдан аллай бир инсан аны чыгъармачылыгъын жаратханлары бек уллу жетишимди. Сёз ючюн, Маликаны ызындан тохташхан «Триумф» эр киши квартет жаланда 10, 5 процент алгъанды. Андан къалгъанла уа - андан аз. Алай бла фахмулу къызыбызны экинчи жери бла ёхтемленирчады.

Таппасханланы Аминат.
Поделиться: