Ди гуапэ зэрыхъущи, ди республикэм гулъытэшхуэ щегъуэт хъыбарегъащIэ технологие пэрытхэм, бжыгъэр зи лъабжьэ Интернетым зегъэужьыным. А унэтIыныгъэхэр зи пщэрылъ министерствэ щхьэхуи къыщызэрагъэпэщауэ щолажьэ ди щIыналъэм. Къэрал къулыкъущIапIэщIэм зэфIиха япэ Iуэхугъуэхэм ящыщщ псынщIагъышхуэ зиIэ Интернет курыт школхэм яIэну Iэмал етыныр.
Бжыгъэр зи лъабжьэ апхуэдэ технологие лъагэхэр еджэным, лэжьыгъэм япэу къыщызыгъэсэбэпыф хъуахэм ящыщщ Бахъсэн щIына-лъэм хыхьэ Ислъэмей жылэм дэт курыт школ №1-р. Бахъсэн районым и администрацэм и пресс-IэнатIэм и унафэщI Чылар Аринэ хъыбар къызэрыдигъэщIамкIэ, школым и егъэджакIуэхэмрэ еджакIуэ цIыкIухэмрэ ИлъэсыщIэм и япэ лэжьэгъуэ махуэхэм къыщыщIэдзауэ «дунейпсо бэджыхъым» зыпащIэф апхуэдэ Iэмал гъуэзэджэмкIэ. А лэжьыгъэр зэфIэха зэрыхъуам я щхьэкIэ зыщагъэгъуэзэну IуэхущIапIэм иджыблагъэ щыIащ КъБР-м и Правительст-вэм и УнафэщIым и къуэдзэ Къу-ныжь МуIэед, КъБР-м бжыгъэр зи лъабжьэ зыужьыныгъэмкIэ и министр Ащхъуэт Ислъам, Бахъсэн районым и щIыпIэ администрацэм и Iэтащхьэ Балъкъыз Артур сымэ. Ахэр арэзы техъуащ Интернетым и лэжьэкIэ псынщIэм. Телефон кIапсэхэмкIэ зэпыщIауэ школым ипэкIэ иIа Интернетым еджакIуэхэм Iэмал къаритыртэкъым а технологиер хуиту, нэсу дерсхэм къыщагъэсэбэпыну, электрон пощтым ирилэжьэну, Интернет напэкIуэцIхэм хэплъэну. Иджы Iуэхур нэгъуэщIщ: мегабит 50 зи псынщIагъ, бжыгъэр зи лъабжьэ Интернетым ныбжьыщIэхэм къахузэIуих Iэмалхэр гъунапкъэншэщ, ауэ щыхъукIи серверым къытемыхьэлъащэу щытщ.
-Апхуэдэ Iэмал гъуэзэджэр фиIэ зэрыхъуамкIэ си гуапэу сынывохъуэхъу псоми, - жиIащ къыщыпсалъэм Къуныжь МуIэед. - Иджы, шэч хэмылъу, егъэджакIуэхэри абыхэм я гъэсэнхэри лъэпощхьэпоуншэу фыхэтыфынущ иджырей егъэджэныгъэм къыхыхьэ технологиещIэхэм. Угъурлы фхуэхъуну ди гуапэщ.
Iуэхугъуэр къызэщIеубыдэ «ХъыбарегъащIэ инфраструктурэ» федеральнэ проектым ипкъ иткIэ зэхагъэува «КъБР-м бжыгъэ технологием зыщегъэужьыным теухуауэ» лъэпкъ программэм. 2021 гъэ пщIондэ зэфIахыну апхуэдэ лэжьыгъэхэр къыщыгъэлъэгъуа а дэфтэрым тепщIыхьмэ, псынщIагъышхуэ зиIэ ИнтернетымкIэ лэжьэну Iэмал къыхузэрагъэпэщынущ социальнэ IэнатIэхэм.