Бэлагъы Къантемыр аргуэру зы саугъэт къехь.

Налшык щыщ режиссёр щIалэ Бэлагъы Къанте­мыр теухуа хъыбары­щIэ­хэм язщ нэхъ пасэу зи гугъу тщIа «Дылда» («КIы­хьсолэ») фильмым иджы США-м хыхьэ Палм-Спрингс къалэм ще­кIуэкIа дунейпсо фес­ти­валым FIPRESCI саугъэ­тыр къызэрыщихьар.
«ХАМЭ къэралыбзэкIэ ягъэува фильм нэхъыфI дыдэ» унэтIыныгъэрщ мы­зыгъуэгу Къантемыр и лэ­жьыгъэр къыщыхагъэщар.
Палм-Спрингс щекIуэкIа зэпеуэр США-м щызэхыхьэ кинофестиваль нэхъ инхэм ящыщщ. 1989 гъэм щегъэжьауэ ар илъэс къэс ирагъэкIуэкI американ уэрэд­жыIакIуэ, артист Боно Сонни и жэрдэмкIэ. Бэ­лагъы Къантемыр а саугъэт дыдэр 2017 гъэм «Теснота» фильмым щхьэкIэ къратауэ щытащ.
Нэхъ пасэу щыгъуазэ фытщIауэ щытащ Бэлагъыхэ я щIалэр «Оскар» саугъэтым щхьэкIэ зэпеуэнухэм я «къебжэкI кIы­хьым» зэрыхэхуам. Зэпеуэр унэтIыныгъэ 24-кIэ йокIуэкI. «Оскар» саугъэтыр зыт комитетым «къебжэкI кIэщI» жыхуаIэм хиубыдэну фильмипщIым я цIэ ­къреIуэ щIышылэм и 13-м. ТекIуахэр мазаем и 9-м Лос-Анджелес къалэм дэт «Долби» театрым утыку­ къыщрашэнущ.
Ар Урысей телевиденэм и япэ каналымкIэ къагъэ­лъэгъуэн хуэдэу хъыбар щы­Iэщ. Налшык щыщ щIалэр апхуэдэпщIэ зиIэ зэпеуэм зэрынэсыфар ехъу­лIэ­ныгъэ къызэрымыкIуэщ. ИтIани, нэхъыфIыжым щIэ­мыхъуэпс щыIэкъыми, адыгэхэм я дежкIэ угъурлыуэ ежьа мы илъэсым Къантемыр и ехъулIэныгъэмкIи дигъэгуфIэну доп­лъэ. И насып Тхьэм три­гъакIуэ.

ЧЭРИМ Марианнэ.
Поделиться: