Кремльде Россейни Президенти Владимир Путинни башчылыгъы бла Къырал советни эл мюлкге аталгъан жыйылыуу болгъанды. Аны ишине Къабарты-Малкъарны Башчысы Казбек Коков да къатышханды.
Кенгешни башлай, Владимир Путин къыралда агропромышленность комплекс айнып баргъанын, эл мюлк продукцияны ёлчеми ёсгенин, бал туз чюгюндюрден, чеплеуден, соядан, мирзеуден бир заманда да болмагъанча бай тирлик жыйылгъанын айырып айтханды. Бек магъаналы товарланы иги кесегини кёрюмдюлери бла Россей Аш-азыкъ къоркъуусузлукъну доктринасы тохташдыргъан чекден озгъанды, агроэкспорт а жылны эсеплерине кёре 24 миллиард доллардан артыкъ окъуна боллукъду, дегенди.
Аны бла бирге,деп къошханды Президент, бек магъаналы ишни тамамламай - элде жашауну игилендирмей – бёлюмню мындан ары да алай жетишимли ишлерге, жангы даражагъа кётюрюлюрге, жаш эмда уста кадрланы кесине тартыргъа онгу боллукъ тюйюлдю. Элле социал ырахатлыкъ, жашау жумушланы женгил этиу, инфраструктураны айнытыу жаны бла энтта да артха къаладыла.
Бек къыйын проблемаладан бири – саулукъ сакълауну биринчи болушлукъ берген бёлюмюню иши иги къуралмагъаныды. Аны игилендириуге къошакъ ахча бёлюрге белгиленеди. Федерацияны субъектлери келир жыл 1 июльгъа тийишли регион программаланы хазырлап, аланы къабыл этерге борчлудула. Ол санда тийишли объектлени ишлеу, жангыртыу, тынгылы ремонт этиу, ФАП-ланы, район больницаланы бла поликлиникаланы кадрла эмда медицина оборудование бла жалчытыу жаны бла шарт мадарла белгилерге керекдиле.
Къырал башчы эл мюлкде иш хакъны кётюрюуню, ата журтлу эл мюлк техника чыгъарыучулагъа себеплик этиуню, фермерлеге бла эл мюлк кооперативлеге электроэнергияны багъасын азайтыуну амалларына да къараргъа кереклисин айтханды.
Тюбешиуде «Эллени комплекс халда айнытыуну» быйыл майда къабыл кёрюлген къырал программасын толтурууну биринчи эсеплерине да къаралгъанды. Анда эллилени жашау къолайлыкъларын игилендириу жаны бла мадарла белгиленнгендиле. Андан сора да, селекцияны, жангы мал ашла жарашдырыуну, ветеринар къоркъуусузлукъну жалчытыуну себепликлери бла эл мюлк продукцияны кёбейтирге кереклисини юсюнден да айтылгъанды.
-Табийгъат байлыкъларыбызны аяу, ууландырмагъан, бизни къудурет хазнабызны бузмагъан амаллагъа баш магъана бериу – ол производствону ёсдюрюуню, россейли продуктланы ким да танырча, сюйюп алырча этиуню амалларыдыла. Биз таза эмда къоркъуусуз, качестволу аш-азыкъ чыгъарыу жаны бла башхаладан иги да онглубуз, аны кючлендире барыргъа керекди,-деп чертгенди Владимир Путин.
Жыйылыуда баш докладла бла РФ-ни эл мюлк министри Дмитрий Патрушев бла Алтай крайны губернатору Виктор Томенко сёлешгендиле.
