Тюнене КъМР-ни Башчысы Казбек Коков Къабарты-Малкъар Республикада Терроризмге къажау комиссияны бла Оператив штабны жыйылыуларын бирге бардыргъанды. Аны ишине КъМР-ни Парламентини Председатели Татьяна Егорова, КъМР-ни Правительствосуну Председатели Мусукланы Алий, КъМР-де баш федерал инспектор Тимур Макоев, толтуруучу власть органланы, кюч структураланы, муниципал къуралыуланы башчылары къатышхандыла.
Жыйылыуда сёз Жангы жылгъа бла Рождествогъа аталгъан къууанчланы кезиуюнде жамауатны къоркъуусузлугъун жалчытыуну юсюнден баргъанды, дагъыда Терроризмге къажау комиссияны 2019 жылда ишини эсеплери чыгъарылгъандыла, келир заманнга борчла белгиленнгендиле.
Казбек Коков байрамланы аллында адамла кёп жыйылыучу объектлени бла тийрелени къоркъуусузлукъларына энчи эс бурургъа, керек болса, къошакъ мадарла да этерге тийишли болгъанын къаты эсгертгенди. Комиссияны ишини юсюнден айта, регионну оноучусу анга Терроризмге къажау миллет комитетни аппаратыны башчылары да бийик багъа бергенлерин билдиргенди. Муниципал комиссияла да ишлерин игилендире баргъанлары кёрюнюп турады, дегенди.
- Болсада халкъны бла социал объектлени къоркъуусузлукълары жаны бла ишни селейтирге арталлыда жарарыкъ тюйюлдю, профилактиканы тирилтирге, право низамны сакълаучула эмда жамауат бла байламлыкъны кючлендирирге керекди. Республикада жашагъанланы къоркъуусузлукълары дайым да ал жанында болургъа тийишлиди,-деп чертгенди Казбек Коков.
Кенгешни кезиуюнде КъМР-де ич ишлени министри Василий Павлов, КъМР-ни культура министрини къуллугъун толтургъан Мухадин Кумахов, КъМР-ни министри Залим Кашироков, РФ-ни МЧС-ини КъМР-де Баш управлениясыны таматасы Михаил Надежин сёлешгендиле.
