КъМР-ни Урунуу эмда социал къоруулау, Культура, Саулукъ сакълау  министерстволары, республиканы профсоюз организацияларыны биригиую,  келе тургъан  Жангы жылгъа атап, уллу  байрам къурагъандыла. Анга деп КъМР-ни Правительствосу бла профсоюзла иги кесек ахча бёлгендиле. Конфетледен бла къалачладан толу  хуржунладан битеу да 12 минги  къуралгъанды.
Профсоюзланы юйюнде къуралгъан байрамгъа Къабарты-Малкъарны шахарларындан бла эллеринден онеки минг чакълы  сабий чакъырылгъанды. Аланы алгъышларгъа уа КъМР-ни урунуу эм социал къоруулау министри Асанланы Алим, «КъМР-ни профсоюз организацияларыны биригиую» Союзну таматасы Фатимат Амшокова,   культура министрни къуллугъун толтургъан Мухадин Кумахов,  башха министерстволаны бла ведомстволаны келечилери да келгендиле.
-Профсоюзла  быйыл къууанчлагъа къатышырыкъ сабийлени санын иги да аслам этерге кереклисин правительствогъа алгъадан окъуна билдиргенди, ол да тилегибизни къабыл кёргенди, - дегенди  Фатимат Амшокова. - Кёп сабийли, къолайсыз юйюрледен балачыкълагъа аслам эс бурулгъанды, дагъыда ёлкалагъа, хар замандача,  кадетле да чакъырылгъандыла.
Байрамны къурагъанла   январьны  бешинчисине   дери  кюн  сайын  бир минг бла эки жюз къызчыкъгъа  бла жашчыкъгъа той-оюн этдирир, саугъала бла къууандырыр мурат этедиле. Ма бу жол да сабийлеге жарыкъ тюбегендиле,  хар замандача,  Къар Аппа бла Къар Къыз, келир жылны белгиси кёк чычхан да  аланы  тепсетгендиле,  жырлатхандыла, назмула айтдыргъандыла, ахырында уа саугъала  юлешгендиле.