Тюнене Музыкалы театрда саулукълары осал, ёксюз,  къарар адамлары болмагъан сабийчиклеге жарыкъ байрам къуралгъанды. Жашчыкълагъа бла къызчыкълагъа театрны артистлери «Золушка» жомакъны кёргюзтгендиле. Бу жандауурлукъ акцияны башламчылары уа КъМР-ни Парламентини депутатларыдыла.  
Быллай жумушну ала биринчи кере бардыргъанларын, анга ахчаны да кеслери бёлгенлерин белгилерчады. Жаш къонакълагъа уа, жомакъдан сора да, саугъала да хазырланнгандыла.    
Спектакль башланнгынчы Парламентни спикери Татьяна Егорова жыйылгъанланы алгъышлагъанды. Ол депутатла окъуучулагъа школларына сюйюп баргъанларын, алай  байрамны аллында уа аланы кеслерине къонакъгъа алыргъа сюйгенлерин белгилегенди.
- Жангы жылны къууанчында  таматала, кичиле да жомакъгъа ийнанадыла, барыбыз да жюрегибизде  болгъан умутла толурларын сакълайбыз. Биз а сизге саулукъ, насып тежейбиз, келир жыл битеу муратларыгъыз толсунла! - дегенди ол.
Алай бла Музыкалы театрны артистлери жаш къонакълагъа сейир жырла, тепсеуле  хазырлагъандыла.  Алагъа бюсюрегенлерин а сабийчикде къарсла бла билдиргендиле.
Ол кюн а байрамгъа республиканы интернатларында,  энчи коррекциялы школлада, «Намыс» реабилитация арада тургъан  500 окъуучу чакъырылгъандыла. Ахырында ала артистле бла бирге ариу жасалгъан назы терекни къатында суратха да тюшгендиле.
Парламентни Билим бериу, илму эм жаш тёлюню ишлери жаны бла комитетини башчысы Нина Емузова бу жумушну юсюнден айта, сабийлени гитчеликден да театргъа, культурагъа  юйретирге тийишли болгъанын чертгенди. «Биз гитче къонакъларыбызгъа эшик аллында тюбегенбиз. Ала бери кирип, артистлени кёргенлеринде, кёзчюклери алай жарыгъанды!  Аланы кёплери театргъа биринчи кере келгенлерине ишексизме.  Бюгюн байрам биз сюйгенча ётсе,  аланы культурагъа, искусствогъа жюреклери ачылыр деп ышанабыз»,- дегенди ол.