Кёп болмай КъМР-ни Экономиканы айнытыу министри Рахайланы Борис предприятияланы таматалары бла тюбешиу бардыргъанды. Анда сёз республикада Экспортёрланы ассоциациясын къурауну юсюнден баргъанды.
Ол предпринимательле кеси ыразылыкълары бла къошулгъан эмда экспортёрланы эркинликлерин къоруулагъан жамауат организация боллукъду. Аны борчу - продукцияларын тыш къыраллагъа сатханланы болумларын игилендириргеди. Ол КъМР-ни Экономиканы айнытыу министерствосуну башламчылыгъы бла къуралады, деп билдиргендиле ведомстводан.
Рахайланы Борис бу биригиу властьны бла бизнесни арасында байламлыкъны кючлерге эм экспортну кёбейтирге ахшы себеплик этеригине ышаннганын билдиргенди. Аны бла бирге, бу жаны бла къыралны эм бизнесге болушлукъ тапдыргъан институтланы да къыйматлы программалары бла проектлери ишлегенлерин, предпринимательлеге ахча, информация эм методология болушлукъ да бериллигин эсгертгенди.
Тюбешиуню ахырында Ассоциацияны башчысына Каздохов Альберт айырылгъанды.