Кёп болмай Къабарты-Малкъар къырал университетде жюзге жууукъ студент бла школчу «Конституцияны кюнюнде» деген жаш тёлю форумгъа къатышхандыла. Аны къыралны Баш законуну даражасын кётюрюр эмда жаш адамланы андан билимлерин ёсдюрюр муратда вузну право жаны бла клубу къурагъанды.
Анга КъМР-ни Парламентинде республиканы Башчысыны бла Правительствосуну эм сюд органланы келечиси Мадина Дышекова, Парламентни Аппаратыны таматасыны орунбасары, право управленияны башчысы Аслан Хамуков, право, экономика эм финансла институтну таматасы Мурат Гукепшоков, КъМКъУ-ну право, экономика эм финансла кафедрасыны таматасы Алим Богатырёв къатышхандыла.
- Мен быллай жыйылыулагъа кёп къатышханма. Аны жарашдыргъанланы бир къаууму бла тюбеширге онгум болгъанды. Ол санда бир кезиуде Россейни юстиция министри, Къырал Думаны да депутаты болуп тургъан Юрий Калмыков бла. Ол Конституция, праводан сора, тарых, миллет, политика эмда башха бёлюмледе да къыралны мурдору болгъанын айтыучу эди. Манга Америкагъа неда Западха тенг болургъа кюрешселе, аны бла бирге кеслерини къыралларын аманласала бек ачыу тиеди. Россей кесини жолу бла таукел айный барады, анга себеплик этген Конституцияды, дегенди Мурат Гукепшоков а.
Форумну программасына кёре жаш адамла «Что? Где? Когда?», «Своя игра», «Alias», «Эскейп-рум», «Гид по праву», «Модель Конституции» дегенча тематикалы эм интеллектуал-право оюнла, тренингле, квестле, мастер-классла, конкурсла да бардыргъандыла.
Ахырында форумгъа къатышханланы барысына да шагъатлыкъ къагъытла берилгендиле, хорлагъанла уа грамоталагъа бла
саугъалагъа тийишли болгъандыла.
