Шабат кюн, 14 декабрьде, Элбрусну тийресинде Краснодардан, Дондагъы Ростовдан, Пятигорскдан, Махачкъаладан башлап Москвагъа, Владивостокга, Курскга, Норильскге, Екатеринбургга, Улан-Удэге дери да тау лыжалада учаргъа сюйгенле, Минги тауну ариулугъун кёрюрге итиннгенле жыйылгъандыла.
Элбрусда солуу кезиуню 50-чи кере ачылыууна къатышханланы арасында уа РФ-ни Президентини Шимал-Кавказ федерал округда толу эркинликли келечиси Александр Матовников, КъМР-ни Башчысы Казбек Коков да бар эдиле. Ала уа бери юйюрлери бла келгенлерин айтырчады.
Быйыл солуу кезиуню башланыууна жууаплы органла тынгылы хазырланнгандыла дерге боллукъду. Алыкъа къар терен жаумагъан эсе да, трассала жангыртылгъандыла, жалгъан къар хазырлагъан энчи оборудование барды, подъёмникле ишленнгендиле. Андан сора да, курортха жангы ратракла (трассаны ариулагъан машинала) келтирилгендиле.
Къонакъланы алгъышлай, Александр Матовников бюгюнлюкде курортну айнытыу жаны бла кёп жумуш тамамланнганын белгилеп, жууукъ кезиуде да жангычылыкъла боллукъларын чертгенди. «Элбрусха келигиз, солугъуз, къууаныгъыз. Мен лыжалада учуп кёргенме, аны зауукълугъун башха зат бла тенглешдирирча тюйюдю»,-дегенди ол.
Казбек Коков а жыйылгъанлагъа насып, къууанч тежегенди. Ол Александр Матовниковха, Кавказны ишлери жаны ба министерствогъа курортха этилген болушлукъ ючюн ыразылыгъын айтханды. «Биз туризмни айнытыуда не жаны бла да себеплик табабыз»,-дегенди ол эмда жаш тёлюню спорт бла кюреширге чакъыргъанды.
Таудан учууну уа Элбрусну тау-лыжа спорт школуна жюрюген сабийчикле ачхандыла. Бу учреждениягъа быйыл 55 жыл толгъанын айтырчады. Александр Матовников ары жюрюген жашчыкъла бла къызчыкъла жууукъ кезиуде спортда жетишимле болдурлукъларына ышаннганын айтханды эмда ала бла бирге суратха тюшгенди.
Байрам а керти да жарыкъ болгъанды. Азаугъа келгенлени Къар Аппагъа письмо жазаргъа онглары болгъанды. Россейни почтасы къурагъан акциягъа Казбек Коков да къатышханды. Ол жюрегинде болгъан тилеклени жазып, аланы Къар Аппагъа жибергенди. Дагъыда алайда «Къабарты-Малкъарны бек ариу жерлери» деген открыткаланы толтуруп, аланы Россейни къайсы жеринде, тышында да танышлагъа жиберирге боллукъ эди. Алагъа уа почта энчи мухурну хазырлагъанды – Элбрусдан учуп баргъан лыжачыны суратын.
Бек кичи къонакълагъа тюрлю-тюрлю жомакъланы жигитлери оюнла къурагъандыла. «Бузну байрамы» уа бютюнда сейир болгъанды. Къонакъла къарап тургъанлай, устала буздан «Элбрус» курортну белгисин ишлегендиле.
Ингир алада къутхарыучула, къолларына факелле алып, таудан энишге учханлары ариу тёреледен бирине айланнганды да, быйыл да къуралгъанды ол. Ол кюн битеу подъёмникле да къонакълагъа хакъсыз ишлегенлерин белгилерчады. Ингирге уа Минги тауну кёгюн фейерверкле жарытхандыла.
Ол кюн, керти да, Азауда халкъ аслам эди: абаданладан башлап бек кичи балачыкълагъа дери. Сёзге, Улан-Удэден Людмила Минги таугъа биринчи кере келгенди. «Алыкъа лыжалада уча билмей мен, алай бу ариулукъгъа жюрегим алай кётюрюлюпдю»,-дегенди ол бизге.
Пятигорскдан Елена Головачева уа Кавказны битеу курортларында да болгъанды. «Бюгюнлюкде Шимал Кавказны шахарларын бир бирлери бла байлап, кластерни къурауну юсюнден кёп айтылады. Ол, сёзсюз, аламат ишди. Таулагъа бир кере келгенни жюреги мында ёмюрлеге къалады. Мен а сегиз жылымдан бери «ауруйма» тау лыжала бла. Регион къоркъуусузду, адамла къонакъбайдыла, табийгъат сейирди. Тамбла Архызгъа, ол ыйыкъда Домбайгъа барыргъа деп турама. Битеу къонакъланы да Кавказгъа чакъырама»,-дегенди ол бизге.