Россейни Конституциясыны кюнюнде КъМР-ни Правительствосунда республиканы премьер-министри Мусукланы Алий окъууда, спортда, регион олимпиадалада, чыгъармачы конкурслада айырмалы болгъанлагъа, кадетлени къауумуна да паспортла бергенди.
Министрлени Кабинетини башчысыны школчула бла тюбешиую аланы Правительствону юйю бла шагъырей этиуден башланнганды. Ызы бла жашчыкъла бла къызчыкъла, чай да иче, не мурат этгенлерини, не зат сюйгенлерини, келир заманнга планларыны юслеринден хапарлагъандыла.
-Россей Федерацияны инсаныны паспорту – ол хар адамны да магъаналы документиди, аны алыу бла сиз абадан жашаугъа энтта бир атлам этесиз. Эндиге дери да окъууда, чыгъармачы эм жамауат ишигизде да жетишимле болдура келесиз, алай ол мындан ары ётерге тюшерик уллу жашау жолугъузну жаланда бир кесегиди. Сиз къыралыбызны келир заманын къурарыкъласыз, биз а не заманда да къатыгъызда боллукъбуз, башламчылыкъларыгъызгъа тутхучлулукъ этерикбиз,-дегенди Мусук улу.
Къууанчха КъМР-ни жарыкъландырыу, илму эмда жаш тёлюню ишлери жаны бла министрини къуллугъун толтургъан Ауес Кумыков да къатышханды.
Паспортла бериу бошалгъандан сора Къабарты-Малкъарны Правительствосуну Председатели Мусукланы Алий аланы алгъанланы алгъышлагъанды, мындан ары да жетишимле болдурурларын сюйгенин билдиргенди, саулукъ эм насып тежегенди.