КъМР-ни Башчысы Юрий Коков Рауль Хаджимбаны бла Анатолий Бибиловну Россей Абхазия эмда Юг Осетия республикаланы жалынчакъсызлыкъларын къабыл кёргенли он жыл толгъаны бла алгъышлагъанды.
«Бюгюн Сухимиде бла Цхинвалда Россей Абхазия эмда Юг Осетия республикаланы жалынчакъсызлыкъларын къабыл кёргенли он жыл толгъанын къууанчлы белгилейдиле. Ол халкъла аралы правону жангы субъектлерини къыраллыкъларын тохташдырыуда бек магъаналы кезиуге саналады.
Озгъан жылланы ичинде Россей Федерацияны болушлугъу бла республикалада социал-экономика айныуну жолунда иги жанына уллу тюрлениуле болгъандыла. Бек башы уа – регионда мамырлыкъ эмда ырахатлыкъ жалчытылынадыла.
Абхазияны, Юг Осетияны бла Къабарты-Малкъарны тёрели шуёх байламлыкъла, бир бирге билеклик этиу, кёп жанлы эмда узакъ болжаллы бирге ишлеу бирикдиредиле. Къабарты-Малкъарны Парламентини, Правительствосуну эмда битеу жамауатыны атларындан, кесим энчи да Абхазия Республиканы Президенти Рауль Джумкович Хаджимбаны, Юг Осетия Республиканы Президенти Анатолий Ильич Бибиловну бу аламат байрам бла жюрегимден къызыу алгъышлайма, къарындаш халкъларыбыз жашнарларын, мамырлыкъда тынч-ырахат жашау этерлерин сюйгеними билдиреме!»-деп айтылады КъМР-ни Башчысыны алгъышлау сёзюнде.
