Тюнене Музыкалы театрда, Къабарты-Малкъарны халкъ поэти, РСФСР-ни М.Горький атлы къырал саугъасыны иеси Зумакъулланы Танзиляны юбилейине жораланып, къууанчлы ингир болгъанды. Анга КъМР-ни Правительствосуну бла Парламентини башчылары, тюрлю-тюрлю министерстволаны бла ведомстволаны, жамауат эм чыгъармачы биригиулени келечилери, республиканы шахарларыны бла эллерини таматалары, жазыучула, алимле, генералла, Танзиляны жууукълары бла ахлулары, аны шуёхлары эмда поэзиясына табыннганла да жыйылгъандыла.
Бизни айтхылыкъ назмучубузну алгъышларгъа Тюркден, Къазахстандан, Татарстандан, Башкъортостандан, Чувашиядан, Москвадан, Шимал Кавказны республикаларындан да кёпле келгендиле. Къонакъланы араларында Кокова Виолетта Таубиевна да болгъаны айтылгъанда, жыйылгъанла анга къарсла бла ыразылыкъларын билдиргендиле.
Биринчи болуп сахнагъа КъМР-ни Правительствосуну Председатели Мусукланы Алий чыгъып, Къабарты-Малкъарны Башчысы Казбек Коковну алгъышлау сёзюн окъугъанды. Кесини атындан да кёп игиликле тежегенди.
Баш докладны уа КъМР-ни культура министрини къуллугъун толтургъан Мухадин Кумахов этгенди. Бек алгъа ол бу аламат байрамгъа жыйылгъанлагъа жюрек ыразылыгъын билдиргенди, тышындан келген къонакълагъа энчи ыспас этгенди. Министр кесини сёзюн Танзиляны назмуларын окъуп кёп кере бёлгенди.
Андан сора кеслерини алгъышлауларын, тежеулерин да КъМР-ни Парламентини Председатели Татьяна Егорова, РФ-ни Къырал Думасыны депутаты Геккиланы Заур, Россейни Жазыучуларыны союзуну председатели Николай Иванов эм кёп башхала айтхандыла.
Танзиляны аты бла келген кёп алгъышлау телеграммала да окъулгъандыла. Назмула да дайым эшитилгенлей тургъандыла. Концерт программа да бай эм сейир болгъанды.
Зумакъулланы Танзиляны юбилейине жораланнган къууанчлы ингирни юсюнден толу отчёт газетни келир номеринде басмаланырыкъды.