Къэбэрдей-Балъкъэр Республикэм и Iэтащхьэ КIуэкIуэ Казбек Налшык къалэм щригъэкIуэкIащ сабийхэмрэ щIалэгъуа­лэм­рэ я зэфIэкIхэр убзы­ху­нымкIэ икIи абыхэм зегъэужьынымкIэ «Антарес» щIыналъэ центрым и попечительскэ советым и зэIущIэ. Абы центрым и лэ­жьыгъэм и унэтIыныгъэ нэхъыщхьэхэр, еджа­кIуэ­хэр къызэрыхах щIы­кIэр щаубзыхуащ икIи эксперт советым щылэжьэну­хэр къыщыхахащ.
Апхуэдэу республикэм и щIалэгъуалэм ящыщу нэхъ зэфIэкIышхуэ зыбгъэ­дэлъ­хэр къэгъэнэIуэ­ным­кIэ икIи абыхэм зегъэужьы­нымкIэ Iэмалхэр, егъэ­джэ­ныгъэ программэ гуэдзэну абы-хэм папщIэ зэхалъхьахэр пхыгъэкIынымкIэ хэ­кIы­пIэ­хэр нэгъэсауэ убзыхун зэ­ры­хуейр къэпсэлъахэм жа- Iащ.
«Антарес» республикэ центрыр «Егъэджэныгъэ» лъэпкъ проектым и щIыналъэ Iыхьэм хиубыдэу къы­зэ­рагъэпэщащ. Ар Къэбэрдей-Балъкъэрым и школакIуэу нэхъ зэфIэкIышхуэ зыбгъэдэлъхэм илъэс хъурейм ядэлэжьэнущ. Прог­раммэм хеубыдэ гъуазджэр, спортыр, естественнэ щIэ­ны­гъэхэр, техническэ творчествэр. Проектыр гъэзэ­щIэ­нымкIэ дэIэпыкъуэгъуу щытынущ Урысей Федерацэм и Президент Путин Владимир и жэрдэмкIэ Сочэ ­къалэм къыщызэрагъэпэща «Сириус» щIэныгъэ цент­рыр, Москва Бауман и цIэр зэрихьэу дэт къэрал техническэ университетыр, Москва дэт физико-техническэ институтыр, республикэм и вузхэр, бизнесым и IэнатIэр, технологие лъагэхэр къыщагъэсэбэп IэнатIэхэм щылэ­жьэ­фыну цIыхухэр егъэ­джэ­ным телажьэ щIыналъэ компание инхэр.
«Антарес» центрым егъэджэныгъэмкIэ и программэхэр гъэзэщIа хъун папщIэ «ДыгъафIэ къалэ» сабий академием иджырей обо­рудованэрэ ар зыхуеину ­программэхэмкIэ къызэгъэпэща лабораторэу 10 къы­щы­зэIуах. Центрым и лэ­жьыгъэр зэтеува нэужь абы 6 - 10-нэ классхэм щеджэ ныбжьыщIэу 500-м щIигъум я щIэныгъэм щыхагъэхъуэ­фынущ. Центрым кърашэ­лIэнухэм я зэхуэдитIым нэхърэ мынэхъ мащIэр къуа­жэхэм къикIынущ. Еджа­кIуэхэм педагог 30 хуэдиз ядэ­лэжьэнущи, абыхэм ящы­щу 13-м нобэм ирихьэлIэу я щIэныгъэм щыхагъэхъуащ Стратегие жэрдэмхэмкIэ агентствэмрэ «Сириус» центрымрэ.
«Антарес» центрым и попечительскэ советым и уна­фэщIу щытынущ республикэм и Iэтащхьэр. Апхуэдэу абы хагъэхьащ КъБР-м и Пар­ламентымрэ Правитель­ствэмрэ я лэжьакIуэхэр, щIэныгъэ, бизнес IэнатIэхэм я лIыкIуэхэр.