Къэрал Думэм и депутатхэм щIыналъэхэм щрагъэкIуэкI тхьэмахуэ лэжьыгъэм хиубыдэу «Урысей зэкъуэт» фракцэм хэт Марьяш Иринэ Iуащхьэмахуэ районым щыIащ икIи Былым, Бедыдж, ЛашкIутIэ къуажэхэм ящыщу зи щхьэ IуэхукIэ къекIуэлIахэм яхуэзащ.
Тхьэусыхафэ, лъэIу зэмылIэужьыгъуэхэр яIэу а махуэм депутатым зыкъыхуагъэзащ цIыху 13-м. Абыхэм нэхъыбэу къаIэтар бынищ, нэхъыбэ зиIэ унагъуэхэм я псэупIэхэр егъэфIэкIуэнырщ, унэхэр зращIыхьын щIапIэхэр яхухэхынырщ.
«Унэхэр ящIын папщIэ цIыхухэм щIы Iыхьэхэр епткIэ зэфIэкIынукъым, щIапIэхэр зыхуеину инфраструктурэмкIэ къызэгъэпэщын хуейщ. Абы къыхэкIыу мы Iуэхур тэмэму дэкIын папщIэ зыхуэфащэ комплекс бгъэдыхьэкIэ къыхуэгъуэтыпхъэщ», - жиIащ Марьяш Иринэ.
Депутатыр иужькIэ еплъащ «Къэбэрдей-Балъкъэр Республикэм физкультурэмрэ спортымрэ зыщегъэужьыныр» къэрал программэм ипкъ иткIэ Былым къуажэм дащIыхь футбол джэгупIэм. Ар къуажэкум щаухуэ, футболым дихьэххэм я щысыпIэхэр иIэу, гъуэр футбол джэгупIэм и мардэхэм къитIасэу.
