Налшык дэт Киноконцерт гъэлъэгъуапIэм щэкIуэгъуэм и 14-м щагъэлъэпIащ зэхагъэхьэжа IэпщэрызауэмкIэ дунейпсо зэхьэзэхуэу Италием щекIуэкIам пашэныгъэр щы­зыубыда Бейтыгъуэн Залым. Уры­сей Федерацэм щыщу абы и закъуэщ иджыри къэс апхуэдэ зэфIэкI лъагэ а спорт лIэужьыгъуэмкIэ къэзыгъэлъэгъуэфар.
«Армэ Iэпщэрызауэ», «Тотал-комбат» лIэужьыгъуэхэм ди лъахэгъум къыщыпэлъэща къыхэкIакъым. Шэч къызытумыхьэн тепщэныгъэ абы зэхьэзэхуэм къыщигъэлъэ­гъуащ икIи хуэфащэ дыдэу дыщэ ме­далыр зыIэригъэхьащ. Бейтыгъуэн Залым зэрысабийрэ егъасэ и адэ ­Заур.
- Италием щекIуэкIа зэпеуэр япэ лъэбакъуэу аращ, - щыжиIащ Къэбэрдей-Балъкъэрым Армэ IэпщэрызауэмкIэ и федерацэм и тхьэмадэ Шэрджэс Заурбэч, Налшык дэт Киноконцерт гъэлъэгъуапIэм щэкIуэгъуэм и 14-м Бейтыгъуэн Залым щагъэ­лъэ­пIэм. - Гъэ къакIуэ щегъэжьауэ ди спорт лIэужьыгъуэмкIэ Европэмрэ дуней псомрэ я чемпионатхэр официальнэу екIуэкIынущ икIи Бейты­гъуэным абыхэми текIуэныгъэфIхэр щиIэну дыщогугъ.
Лашынкъей къуажэм къыщалъхуа Бейтыгъуэн Залым илъэс зыбжанэ ­хъуауэ Iэпщэрызауэм хэтщ икIи ­ехъулIэныгъэфIхэр зыIэригъэхьащ. Къапщтэмэ, Къэбэрдей-Балъкъэр мэкъумэш университетым щеджэ ­зэманым ар унифайтымкIэ (лъэ­по­ щ­хьэпохэр къызэнэкIынымрэ Iэп­щэ­ры­зауэмрэ зыхэт двоеборьещ) студентхэм я деж дуней псом щэнейрэ чемпион щыхъуащ. Иджы балигъхэм я Iэпщэрызауэм текIуэныгъэ инхэр щызыIэрегъэхьэ.
Дунейпсо Арт комитетым и тхьэмадэм и къуэдзэ Бейтыгъуэн Iэуес къыхигъэщащ Залым и ехъулIэныгъэхэм зэрылъэпкъыу зэрыригуш­-хуэр икIи нэхъыбэжкIэ зэрыщыгугъыр. Iэгуауэшхуэм щIэту, зи лIыкIуэ комитетым къыбгъэдэкI щIыхь тхы­лъымрэ саугъэт лъапIэмрэ спортсмен щIалэмрэ абы и тренерымрэ яритыжащ.
Налшык дэт Киноконцерт гъэлъэ­гъуапIэм Бейтыгъуэн Залым теухуауэ къыщызэрагъэпэща пшыхь гуапэр ягъэбжьыфIащ Къэбэрдей-Балъкъэ­рым и уэрэджыIакIуэ, къэфакIуэ цIэрыIуэхэм.
Жыласэ Замир.